فلموں کی ڈاؤن لوڈنگ: ہالی ووڈ اسٹوڈیوز کا مقدمہ خارج

آسٹریلیا کے ہائی کورٹ میں اپیل دائر کرنے والوں میں بڑی آسٹریلوی کمپنیوں کے ہمراہ امریکی فلم انڈسٹری ہالی ووڈ کے مشہور فلم پروڈکشن اسٹوڈیوز وارنر برادرز، ڈزنی اور ٹوئنٹیئتھ سینچری فوکس شامل تھے۔ انہوں نے آسٹریلیا کے انٹرنیٹ سروس فراہم کرنے والے بڑے ادارے آئی آئی نیٹ (iiNet) کے خلاف اپیل میں یہ مؤقف اپنایا تھا کہ انٹرنیٹ سروس مہیا کرنے والے ادارے کی جانب سے کاپی رائٹ کی خلاف ورزی کی وجہ سے انہیں اربوں ڈالر کے نقصان کا سامنا ہے۔

اس اپیل میں آسٹریلوی حقوق دانش کے نگران ادارے آسٹریلین فیڈریشن آف کاپی رائٹ تھیفٹ (AFACT) نے کل چونتیس مثالیں اپیل میں شامل کی تھیں اور عدالت کو قائل کرنے کی کوشش کی تھی کہ انٹرنیٹ سروس فراہم کرنے والے ادارے نے فلم، ٹیلی وژن اور میوزک کمپنیوں کے کام کو پیش کر کے ایک غلط مثال قائم کی ہے اور یہ عمل ایک نامناسب رجحان کو فروغ دینے کا باعث بن سکتا ہے۔

ہائی کورٹ نے کاپی رائٹ کے زمرے میں آنے والے اس سرقے کے مقدمے کو خارج کردیا ہے۔ عدالت کے خیال میں کاروباری یا کمرشل انداز میں تیار کی گئی فلمیں اور ٹیلی وژن پروگرام پیش کرنے سے انٹرنیٹ سروس فراہم کرنے والے ادارے کے گاہکوں کی جانب سے کوئی سرقے کا عمل سرزد نہیں ہو رہا۔ عدالت کے مطابق انٹرنیٹ فراہم کرنے والے ادارے کے پاس کوئی براہ راست ٹیکنیکل سہولت نہیں کہ وہ اپنے کسٹمرز کو ڈاؤن لوڈنگ سے باز رکھ سکے۔

آسٹریلیا میں یہ کیس کاپی رائٹس کے تناظر میں بہت اہمیت اختیار کر گیا تھا۔ آسٹریلوی شہر پرتھ میں قائم انٹرنیٹ سروس فراہم ادارے آئی آئی نیٹ کے کسٹمرز نے جون سن 2008 کے بعد انسٹھ ہفتوں کے دوران نوے فلموں اور ٹیلی وژن پروگراموں کو ڈاؤن لوڈ کیا تھا۔ ان میں کئی مشہور فلمیں شامل تھیں۔ عدالتی عمل گزشتہ تین سالوں پر محیط تھا۔ آئی آئی نیٹ نے عدالتی فیصلے کا خیر مقدم کیا ہے۔

آسٹریلیا میں مقدے میں شامل ہو کر ہالی ووڈ کے فلم اسٹوڈیوز در اصل میں ساری دنیا میں انٹر نیٹ سروس فراہم کرنے والے اداروں کے لیے کاپی رائٹس کی خلاف ورزی کے تناظر میں ایک مثال قائم کرنے کی خواہش رکھتے تھے کہ وہ سرقے کا ارتکاب کرنے والوں کے خلاف عدالتی چارہ جوئی کرتے رہیں گے، مگر ایسا نہیں ہو سکا۔ دوسری جانب انٹرنیٹ سروس فراہم کرنے والے اداروں کو تشویش تھی کہ عدالتی فیصلہ اگر ان کے خلاف آیا تو اس سے ان کے کسٹمرز کی تعداد میں انتہائی کمی واقع ہو جائے گی۔

ah/ng ( AFP, AP)