فلسطینی اتھارٹی کے وزیر اعظم مستعفی

نیوز ایجنسی اے ایف پی نے رملہ سے موصولہ رپورٹوں کے حوالے سے بتایا ہے کہ محمود عباس اور سلام فیاض کے مابین کئی ہفتوں سے پائے جا رہے اختلافات کو ختم کرنے کے لیے امریکا نے بھی کوششیں کیں۔ تاہم یہ کارگر ثابت نہ ہوسکیں اور جمعے کے دن سلام فیاض نے مستعفی ہونے کا اعلان کر دیا۔

فلسطینی اتھارٹی کے ایک اعلیٰ اہلکار نے اپنا نام مخفی رکھنے کی شرط پر اے ایف پی کو بتایا، ’’ فیاض نے مغربی اردن میں رملہ میں واقع صدر دفتر میں عباس سے ملاقات کی۔ آدھے گھنٹے کی اس ملاقات کے دوران فیاض نے باضابطہ طور پر اپنا استعفیٰ صدر کے حوالے کر دیا ہے۔‘‘

فلسطینی اتھارٹی کے ایک اور اہلکار نے بتایا ہے کہ البتہ صدر عباس نے فیاض سے درخواست کی ہے کہ جب تک نئے وزیر اعظم کو چن نہیں لیا جاتا، وہ بطور نگران وزیر اعظم اپنی ذمہ داریاں نبھاتے رہیں۔ ایسی اطلاعات ہیں کہ جلد ہی نئے وزیر اعظم کے نام کا اعلان کر دیا جائے گا۔

امریکا سے تعلیم یافتہ ماہر اقتصادیات سلام فیاض اور صدر محمود عباس کے مابین اقتصادی پالیسیوں پر اختلافات پائے جا رہے تھے۔ تاہم رواں ہفتوں کے دوران عباس کی فتح پارٹی نے فیاض پر تنقید میں اضافہ کر دیا تھا۔

امریکی کوششیں بے سود

اطلاعات ہیں کہ واشنگٹن حکومت کی کوشش تھی کہ 61 سالہ سلام فیاض وزارت عظمیٰ کے عہدے پر براجمان رہتے۔ ناقدین کے بقول اس مخصوص وقت میں سلام فیاض کا حکومت سے الگ ہو جانا، اسرائیل اور فلسطینی رہنماؤں کے مابین امن مذاکرات کی بحالی کی امریکی کوششوں کے لیے ایک دھچکے سے کم نہیں ہے۔

فلسطینی اتھارٹی کے ذرائع نے بتایا ہے کہ جمعے کی رات امریکی وزیر خارجہ جان کیری نے صدر محمود عباس سے ٹیلی فون پر گفتگو بھی کی۔ اس دوران کیری نے زور دیا کہ عباس وزیر اعظم کے ساتھ مصالحت کا کوئی راستہ تلاش کرنے کی کوشش کریں۔

گزشتہ کئی دنوں سے ایسی افواہیں گردش کر رہی تھیں کہ یا تو سلام فیاض خود ہی مستعفی ہو جائیں گے یا پھر صدر ان سے استعفیٰ طلب کر لیں گے۔ اقتصادی پالیسیوں پر اختلافات کے باعث دو مارچ کو وزیر خزانہ نبیل قسیس نے استعفیٰ دے دیا تھا۔ اگرچہ سلام فیاض نے اپنی کابینہ کے اس اہم رکن کا استعفیٰ قبول کر لیا تھا تاہم صدر محمود عباس نے اسے رد کر دیا تھا۔

فلسطینی اتھارٹی کے ایک اعلیٰ عہدیدار کے بقول سلام فیاض نے 23 مارچ سے ہی اپنا استعفیٰ تیار کر لیا تھا تاہم امریکی صدر باراک اوباما کے دورہء مشرق وسطیٰ اور صدر عباس کے بیرون ممالک دوروں کی وجہ سے داخل دفتر نہیں کرایا تھا۔ 2007ء میں وزیر اعظم کا منصب سنبھالنے والے سلام فیاض نے مئی 2012ء میں نبیل قسیس کو وزیر خزانہ بنائے جانے تک وزارت خزانہ کا قلمدان بھی سنبھالے رکھا تھا۔

(ab/ng (AFP