فرانس میں ہائی اسپیڈ ریل سسٹم پر حملہ، مشتبہ شخص گرفتار

فرانسیسی وزیر داخلہ جیرالڈ دارمانیں نے آج بروز پیر کہا کہ پچھلے ہفتے ملکی ہائی اسپیڈ ریلوے نیٹ ورک پر ہونے والے حملوں کے بعد حکام نے انتہائی بائیں بازو کے خیالات رکھنے والے ایک شدت پسند شخص کو گرفتار کر لیا ہے۔

فرانس کے ہائی اسپیڈ ریلوے نیٹ ورک پر آتش زنی کی صورت میں یہ حملے جمعہ کو پیرس اولمپکس کی افتتاحی تقریب سے چند گھنٹے قبل ہوئے تھے، جن کی وجہ سے  لاکھوں مسافروں کے سفر میں خلل پیدا ہوگیا تھا۔

فرانسیسی وزیر داخلہ نے بتایا ہے کہ اس واقعے میں ملوث ہونے کے شبے پر ایک انتہائی بائیں بازو کے ایکٹیوسٹ کو اتوار کے روز اوئسل میں ایک ''ریلوے سائٹ‘‘ سے گرفتار کیا گیا۔

اس حوالے سے خبر رساں ادارے اے ایف پی کی ایک رپورٹ میں پولیس ذرائع کا حوالہ دیتے ہوئے کہا گیا ہے کہ مشتبہ شخص کی مبینہ طور پر بائیں بازو کے لٹریچر تک رسائی تھی اور ساتھ ہی اسے فرانس کی سرکاری ریل کمپنی ایس این سی ایف کی تکنینکی تنصیبات کی چابیوں اور آلات تک بھی رسائی حاصل تھی۔

اس کے علاوہ جیرالڈ دارمانیں کا مزید کہنا تھا کہ اس واقعے میں ملوث تخریب کاروں نے ان حملوں کے لیے جو طریقہ کار اپنایا تھا، وہ انتہائی بائیں بازو کے شدت پسندوں کے طریقہ کار سے مماثلت رکھتا ہے۔

ٹی وی چینل فرانس ٹو ٹی وی سے گفتگو کے دوران انہوں نے مزید بتایا، ''ہم نے متعدد افراد کی شناخت کی ہے۔ اس طرح کی کارروائی روایتی طور پر انتہائی بائیں بازو (کے افراد) کی جانب سے کی جاتی رہی ہے۔‘‘

لیکن ساتھ ہی انہوں نے جلد کسی نتیجے پر پہنچنے کے خلاف تنبیہ بھی کی۔ ان کا کہنا تھا، ''ہمیں محتاط رہنا چاہیے۔‘‘

ٹرینوں کی آمد و رفت بحال

جمعہ کے واقعے کے بعد آج بروز پیر فرانس میں ہائی اسپیڈ ٹرینوں کی آمد و رفت بحال ہونے کے بعد معمول کے مطابق جاری تھی۔

فرانسیسی وزیر داخلہ جیرالڈ دارمانیں کے مطابق ملک میں اٹھائیس ہزار کلومیٹر پر پھیلے ہائی اسپیڈ ریلوے نیٹ ورک کی سکیورٹی کے لیے 50 ڈرونز کا استعمال کیا جا رہا ہے اور ساتھ ہی 250 ریل سکیورٹی ایجنٹ اور 1,000 مینٹنینس اہلکار تعینات کر دیے گئے ہیں۔

انہوں نے ماحولیات کے حوالے سے کام کرنے والے گروپ 'ایکسٹنکشن ربیلین‘ کے  45 کارکنوں کی گرفتاری کی بھی تصدیق کی۔

دریں اثنا، فرانسیسی پولیس نے کہا ہے کہ آج ملک کے چھ علاقوں میں متعدد ٹیلی کمیونیکیشن آپریٹرز کے فائبر آپٹک نیٹ ورکس کو ''تخریب کاری‘‘ کا نشانہ بنایا گیا۔

م ا ⁄ ش ر (روئٹرز، اے ایف پی)