غزہ میں جنگ بندی: جرمن وزیر خارجہ کا دورہ مشرق وسطیٰ شروع
5 ستمبر 2024جرمن وزیر خارجہ اینالینا بیئربوک خطے کے رہنماؤں سے ملاقات کے لیے بدھ کو سعودی عرب، اردن، اسرائیل اور مغربی کنارے کے دورے پر روانہ ہوئیں۔ دورے کے پہلے مرحلے میں وہ سعودی عرب کے دارالحکومت ریاض پہنچ گئی ہیں۔ اکتوبر میں اسرائیل پر حماس کے حملے کے بعد سے یہ مشرق وسطیٰ کا ان کا گیارہواں اور اسرائیل کا نواں دورہ ہے۔
غزہ میں جنگ بندی معاہدہ اب ناگزیر ہو چکا، امریکہ
جنگ بندی معاہدہ: اسرائیلی وزیر اعظم نیتن یاہو پر دباؤ بہت بڑھ چکا
ان کا یہ دورہ غزہ جنگ کے خاتمے کے لیے متحارب فریقوں کے درمیان معاہدے کی تلاش میں جاری سفارتی کوششوں کے درمیان ہو رہا ہے۔
عسکریت پسند گروپ حماس کو امریکہ، جرمنی، یورپی یونین اور دیگر نے دہشت گرد تنظیم قرار دیا ہے۔
امکان ہے کہ بات چیت میں جنگ بندی کے لیے تعطل کے شکار مذاکرات پر توجہ مرکوز کی جائے گی، جو حال ہی میں غزہ میں چھ اسرائیلی یرغمالیوں کی لاشوں کے ملنے اور اسرائیلی وزیر اعظم بنجمن نیتن یاہو کی جانب سے جوابی کارروائی کی دھمکی کے باعث مزید پیچیدہ ہو گئے ہیں۔
بیئربوک کا ایجنڈہ کیا ہے؟
بدھ کے روز دورے پر روانہ ہونے سے قبل بیئرباک نے غیرمعمولی طور پر واضح لفظوں میں کہا کہ اسرائیلی حکومت کو فلسطین تنازعہ کے دو ریاستی حل پر بات چیت سے مزید انکار نہیں کرنا چاہیے۔
انہوں نے کہا کہ اسرائیلی حکومت کے وہ ارکان جو دو ریاستی حل پر سوال اٹھاتے ہیں وہ اپنے قول و فعل سے اسرائیل کے طویل مدتی سلامتی کو خطرے میں ڈال رہے ہیں۔
جرمن وزیر خارجہ کا کہنا تھا،"دیرپا امن کے لئے دو ریاستی حل پر بات چیت ہی واحد راستہ ہے۔ طویل مدت میں دہشت گردی کا مقابلہ کرنے کا یہی واحد طریقہ ہے۔"
جرمن وزارت خارجہ کی ترجمان کیتھرین ڈیشاؤر نے بتایا کہ بیئربوک کا پہلا پڑاؤ سعودی عرب ہے جہاں وہ وزیر خارجہ فیصل بن فرحان السعود سے ملاقات کریں گی۔
انہوں نے کہا کہ جمعرات کی بات چیت "خطے کی ڈرامائی صورت حال" اور "یمن کی بنیاد پرست اسلام پسند حوثی ملیشیا کی طرف سے بین الاقوامی جہاز رانی پر جاری حملوں پر مرکوز ہو گی۔"
بیئربوک اس کے بعد اردن جائیں گی، جہاں وہ اپنے اردنی ہم منصب ایمن صفادی سے ملاقات کریں گی۔ وہ خاص طور پر غزہ کے لوگوں کے لیے انسانی امداد کو مربوط کرنے کے معاملے پر بات چیت کرنے کے لیے وہاں جارہی ہیں۔
اسرائیل کا دورہ
اسرائیل میں وزیر خارجہ اسرائیل کاٹز اور وزیر دفاع جواو گیلنٹ کے ساتھ جمعہ کو بات چیت طے ہے۔
جرمن وزارت خارجہ کی ترجمان نے کہا، "اس بات چیت میں وہ فوری طور پر درکار انسانی بنیادوں پر جنگ بندی کے منصوبوں پر توجہ مرکوز کریں گی، جس سے یرغمالیوں کی رہائی اور غزہ کے لوگوں کے لیے فوری طور پر انسانی امداد کی ضرورت شامل ہے۔"
بیئربوک اس کے بعد مقبوضہ مغربی کنارے کا سفر کریں گی، جو کہ حالیہ شدید جھڑپوں کا میدان بنا ہوا ہے۔ وہاں وہ فلسطینی اتھارٹی کے وزیر اعظم محمد مصطفیٰ سے ملاقات کریں گی اور اس بات پر تبادلہ خیال کریں گی کہ "مغربی کنارے میں تشدد میں تیزی سے اضافے کو کیسے روکا جا سکتا ہے۔"
ج ا ⁄ ص ز(اے پی، اے ایف پی، ڈی پی اے، روئٹرز)