’طاہرالقادری مذاکرات میں ڈیڈ لاک ختم کرنے پر راضی‘

اتوارکے روز شاہراہ دستور پر اپنی جماعت کے دھرنےکے شرکاء سے خطاب کرتے ہوئے عمران خان نے کہا کہ نواز شریف کے استعفے کے بغیر کوئی بات نہیں ہوسکتی اور وہ اپنے مطالبے کو منوانے کے لیے ملک بھر میں پہیہ جام کر دیں گے۔ عمران خان نے اپنی جماعت کے مؤقف کو دہراتے ہوئے کہا کہ جب تک انتخابی دھاندلی کی تحقیقات ہو رہی ہیں، وزیراعظم اپنے عہدے سے الگ ہو جائیں۔

عمران خان نے کہا کہ کنٹینر کھڑے کرکے لوگوں کو دھرنے کے مقام پر آنے سے روکا جارہا ہے۔ انہوں نے کہا کہ حکومت مذاکراتی ٹیم بھیجنے سے پہلے کنٹینر ہٹائے ۔ انہوں نے کہا، ’’جو مرضی کر لو نواز شریف،کنٹینر لگاؤ، جو بھی کرو وقت تمہارا ختم ہو چکا ہے، تم نئے پاکستان کو بننے سے نہیں روک سکتے۔‘‘

تحریک انصاف کے ساتھ حکومتی ٹیم کے مذاکرات میں ہفتے کی شب اس وقت ایک مرتبہ پھر تعطل آگیا تھا جب فریقین نے اپنے مؤقف سے پیچھے ہٹنے سے انکار کر دیا۔ وزیراعظم کے استعفے کے مطالبے پر ڈٹی ہوئی تحریک انصاف کی مذاکراتی ٹیم کے رکن شاہ محمود قریشی کا کہنا تھا کہ افسوس ہے کہ ایک شخص کی خاطر جمہوریت کی قربانی دی جارہی ہے۔

وفاقی وزیر اور مسلم لیگ ن کی مذاکراتی ٹیم کے رکن احسن اقبال کا کہنا تھا کہ ضد اور انا کی وجہ سے سب کچھ داؤ پر لگایا جارہا ہے۔ انہوں نے کہا، ’’میں عمران خان صاحب سے اور قادری صاحب سے پھر یہی درخواست کروں گا کہ ہم خلوص نیت اور سنجیدگی کے ساتھ مذاکرات کے ذریعے حل چاہتے ہیں۔ وہ اشتعال کے راستے پر نہ چلیں۔ آپ کے جن لوگوں نے دھرنا دیا ہم نے ان کا احترام کیا۔کسی دھرنے والے کو اٹھا کر باہر نہیں پھینکا۔‘‘

دوسری جانب حکومتی ٹیم نے اتوار کو عوامی تحریک کے نمائندوں سے ملاقات کی۔ اس ملاقات کے بعد مقامی ذرائع ابلاغ پر ایسی خبریں بھی گردش کرتی رہیں کہ پنجاب کے وزیر اعلیٰ شہباز شریف اپنے عہدے سے مستعفی ہونے کے لئے تیار ہیں۔ ان خبروں کی مسلم لیگ (ن) کے حلقوں نے تردید کی ہے۔

اتوار کی شام عوامی تحریک کے دھرنے کے شرکاء سے خطاب کرتے ہوئے طاہرالقادری نے کہا کہ انہوں نے مذاکرات کے دروزاے کبھی بند نہیں کیے۔ انہوں نے کہا، ’’ اگر نواز شریف اور شہباز شریف بھی بات چیت کے لئے میرے دروازے پر آئیں تو انہیں دھکے نہیں دوں گا۔ انہوں نے کہا کہ اگر انہیں شہید کر دیا گا تو اس کے بعد پارلیمنٹ ہاؤس شہدا کا قبرستان بن جائے گا۔‘‘

تجزیہ کاروں کا کہنا ہے کہ احتجاج کرنے والوں کی جانب سے وزیر اعظم کے استعفی کے مطالبے اور حکومت کے اس مطالبے کو ماننے سے انکار نے صورتحال کو بند گلی میں لا کھڑا کیا ہے۔ گیارہ دن سے جاری اس احتجاج کی وجہ سے پہلے سے کمزور معیشت کو بھاری نقصان برداشت کرنا پڑ رہا ہے۔