’طاہرالقادری تو پُہنچ گئے لیکن فوج اُن کی مدد کو نہ پُہنچی‘

لاہور کے جناح ہسپتال میں زیر علاج کارکنوں کی عیادت کے موقعے پر میڈیا سے گفتگو کرتے ہوئے پاکستان عوامی تحریک کے سربراہ کا کہنا تھا، ’’سانحہ ماڈل ٹاؤن میں ظلم اور ریاستی تشدد کی انتہا کر دی گئی، ان کے کارکنوں کو سیدھی گولیاں ماری گئیں، شہباز شریف نے نہتے عوام کا قتل عام کیا۔ ہم شہدا کے خون کا انتقام لیں گے، حکومت کو عدلیہ اور قانون کے ذریعے ان مظالم کا حساب دینا ہوگا۔‘‘

اس سے پہلے سوموار کی صبح اسلام آباد میں ہزاروں افراد پر مشتمل استقبالی ہجوم سے خطاب کے خواہش مند ڈاکٹر قادری کا جہاز جب لاہور کے علامہ اقبال انٹرنیشنل ایئرپورٹ پر پہنچایا گیا تو انہوں نے احتجاج کرتے ہوئے جہاز سے نیچے اترنے سے انکار کر دیا۔ اس موقعے پر ان کا کہنا تھا کہ انہیں پولیس پر اعتبار نہیں، اس لئے جب تک پاکستانی فوج انہیں اپنی حفاظت میں لے کر نہیں جاتی، وہ جہاز سے نہیں اتریں گے۔

پانچ گھنٹے کے طویل مذاکرات کی ناکامی کے بعد بالآخر وہ پنجاب کے گورنر چوہدری محمد سرور اور مسلم لیگ( ق) کے رہنما چوہدری پرویز الہٰی کے ہمراہ لاہور ایئرپورٹ سے اپنے ذاتی محافظین کے ساتھ باہر نکلے اور جناح ہسپتال کے لیے روانہ ہوگئے۔ اس موقعے پر لاہور ایئر پورٹ پر پاکستان عوامی تحریک کے کارکن بڑی تعداد میں پہنچ چکے تھے۔ انہوں نے نعرے لگاتے ہو ئے ایئرپورٹ میں گھسنے کی کوشش بھی کی۔ لاہور میں سخت حفاظتی انتظامات کیے گئے تھے اور کئی علاقوں میں موبائل سروس بھی کچھ دیر کے لیے بند کر دی گئی تھی۔

جناح ہسپتال پہنچ کر انہوں نے وہاں زیر علاج پاکستان عوامی تحریک کے زخمی کارکنوں کی عیادت کی اور اس بارے میں ڈاکٹروں سے بریفنگ بھی لی۔ یاد رہے مذہبی رہنما ڈاکٹر طاہرالقادری 2006ء سے کینیڈا میں مقیم ہیں، آج کل وہ اپنے لاکھوں کارکنوں کے ذریعے ایک حکومت مخالف تحریک چلا رہے ہیں۔ پاکستان میں ایسی افواہیں بھی گردش کر رہی ہیں کہ ڈاکٹر قادری کو سول حکومت کے خلاف ایک منظم ریاستی ادارے کی حمایت حاصل ہے۔

پاکستان کے معروف صحافی مجیب ا لرحمان شامی نے ڈی ڈبلیو کو بتایا کہ یہ ایک اچھی بات ہے کہ ڈاکٹر قادری خیریت سے ماڈل ٹاؤن اپنی منزل پر پہنچ چکے ہیں اور آج کوئی بڑا ناخوشگوار واقعہ دیکھنے میں نہیں آیا۔ ان کے نزدیک ڈاکٹر قادری کے اصرار پر بھی فوج کا نہ آنا ایک مثبت پیش رفت ہے۔ ان کی رائے میں اگر پاکستانی حکمرانوں نے مستقبل میں بھی آج جیسی فراست کا ثبوت دیا تو ملکی حالات بہتر ہو سکتے ہیں۔ ان کی رائے میں ملکی ترجیحات کو درست کرنے کی شدید ضرورت ہے۔