شمالی امریکا جنگلات کی آگ اور گرمی کی شدید لہر سے دو چار

امریکا اور کینیڈا جیسے ممالک میں گیارہ جولائی اتوار کے روز عوام کو بڑھتے ہوئے درجہ حرارت کی وجہ سے شدید پریشانیوں کا سامنا کرنا پڑا کیونکہ گرمی کی شدید لہر کے سبب حکام کو بعض علاقوں سے انخلا کروانا پڑا جبکہ کچھ علاقوں میں سڑکوں کی بندش اور ٹرین سروسز کو بھی محدود کرنا پڑا۔

امریکی محکمہ موسمیات نے اپنی ویب سائٹ پر اعلان کیا ہے کہ گرمی کی، ''ایک خطرناک لہر مغربی امریکا کے بیشتر علاقوں کو متاثر کر سکتی ہے اور اس کی وجہ سے ریکارڈ توڑ درجہ حرارت کا امکان ہے۔'' اس میں فینکس اور سان جوز جیسے شہروں میں بھی شدید گرمی کے لیے متنبہ کیا گیا ہے۔

جون کے بعد گرمی کی دوسری لہر

امریکا اور کینیڈا کے بعض علاقوں میں چند ہفتے قبل بھی شدید گرمی پڑی تھی جس میں درجنوں افراد ہلاک ہو گئے تھے۔ ماحولیات پر نظر رکھنے والے یورپی یونین کے ایک ادارے کے مطابق شمالی امریکا میں گزشتہ جون اب تک کا سب سے گرم مہینہ تھا۔

شدید گرمی کی وجہ سے جنگلوں میں آگ بھی لگ گئی تھی جس کی وجہ سے جنگل کے کافی بڑے علاقے تباہ ہو گئے۔ جنگلوں میں آگ کی وجہ سے مختلف علاقوں کے لوگوں کو مجبوراً اپنی رہائش گاہوں سے انخلا کرنا پڑا۔ امریکی ریاست کیلیفورنیا کے ڈیتھ ویلی علاقے میں سب سے زیادہ درجہ حرارت درج کیا جاتا ہے۔

 

اتوار کے روز اسی علاقے میں 'فورانسک گریک' کے پاس نصب ایک بڑے ڈیجیٹل تھرما میٹر کے پاس بڑی تعداد میں لوگ درجہ حرارت دیکھنے کے لیے جمع ہوئے۔ لوگوں نے تھرما میٹر پر دیکھا کہ درجہ حرارت 135 ڈگری فارن ہائٹ یعنی 57 ڈگری سیلسیئس تھا۔ اس علاقے میں اس سے قبل اتنا درجہ حرارت کبھی بھی ریکارڈ نہیں کیا گیا تھا۔

کینیڈا میں بھی حکام نے شدید گرمی کی وجہ سے باہر نکلنے والوں کے لیے تحفظ سے متعلق ہدایات جاری کی ہیں۔ اس شدید درجہ حرارت کے دوران ریل چلنے سے چنگاریاں بھڑک اٹھنے کا خطرہ رہتا ہے جس سے جنگلات میں آگ لگ سکتی ہے۔

حال ہی میں کینیڈا میں لیوٹن شہر کے آس پاس کے بڑے رقبے کے جنگلات جل کر خاک ہو گئے تھے اور حکام اب اس بات کی تفتیش میں لگے ہیں کہ کہیں یہ آگ ریل کی وجہ سے تو نہیں لگی تھی۔ کیلیفورنیا اور برٹش کولمبیا کے علاقوں میں بھی آگ لگنے سے بڑی تعداد میں جنگلات تباہ ہو گئے ہیں۔

گزشتہ چھ برسوں سے مسلسل درجہ حرارت میں اضافہ درج کیا جاتا رہا ہے۔ موسمیات سے متعلق عالمی ادارے 'ورلڈ میٹرولوجیکل آرگنائزیشن'  کے مطابق اگلے پانچ سالوں کے اندر اوسطاً عالمی درجہ حرارت میں سالانہ 1.5 ڈگری سے تجاوز کرنے کا 40 فیصد امکان موجود ہے۔ 

ادھرشمالی بھارت کے بھی کئی علاقوں میں گرمی کی شدید لہر جاری ہے۔ یہ ساون کا مہینہ ہے جو دہلی اور لکھنو جیسے شہروں میں بارش اور خوشگوار موسم کے لیے معروف ہے۔ تاہم ان علاقوں میں گزشتہ تقریباً تین ہفتوں سے گرمی کی شدید لہر چل رہی ہے۔

دہلی میں محکمہ موسمیات کے مطابق تقریباً پندرہ برسوں کے بعد مانسون کی آمد میں اتنی تاخیر ہوئی ہے۔ اس خطے میں عام طور پر جون کے اواخر یا پھر جولائی کے پہلے ہفتے میں مانسون آتا ہے تاہم اس بار ابھی تک اس کو کوئی پتہ نہیں ہے۔

ص ز/ ج ا (اے ایف پی، روئٹرز، اے پی)