شام کے امن میں رکاوٹ سعودی عرب ہے، حزب اللہ

پیر کے روز لبنان کی حزب اللہ تنظیم نے سعودی عرب کے خلاف بیان دیتے ہوئے کہا کہ وہ شام امن مذاکرات کی راہ میں اس لیے رکاوٹ ڈال رہا ہے کہ شام کی صورت حال اس کے حق میں نہیں جا رہی ہے۔ حزب اللہ کے رہنما حسن نصر اللہ نے سعودی عرب پر یہ تنقید ایک تقریر میں کی جسے بیروت کے جنوبی نواحی علاقوں میں بذریعہ اسکرین نشر کیا گیا۔ یہ علاقے حزب اللہ کا گڑھ قرار دیے جاتے ہیں۔

واضح رہے کہ شام میں صدر بشار الاسد کی حکومت کے خلاف برسر پیکار باغیوں کو سعودی حکومت کی حمایت حاصل ہے۔ اسد حکومت کی ایران اور حزب اللہ تائید کرتے ہیں۔

نصر اللہ نے اپنی تقریر میں کہا، ’’آج شام میں جاری بحران حل کے لیے سیاسی مذاکرات کو شام کے اندر سے اور علاقائی اور بین الاقوامی سطح پر حمایت حاصل ہے، مگر ایک ملک ایسا ہے جو اس کے خلاف ہے اور اس کا نام سعودی عرب ہے۔‘‘

نصر اللہ نے الزام عائد کیا ہے وہ شام میں جنگجو، ہتھیار اور رقم بھیج رہا ہے تاکہ اسد حکومت کو گرایا جا سکے۔

سعودی عرب کی جانب سے مجوزہ ’جنیوا ٹو‘ امن کانفرنس کی حمایت بھی سامنے نہیں آئی ہے۔ دوسری جانب شامی باغيوں کی جانب سے گزشتہ ہفتے کے روز جاری کردہ ايک تحريری بيان ميں کہا گیا تھا کہ ’’کوئی بھی ايسا حل جو صدر اسد کی حکومت، فوجی کارروائیوں کے خاتمے اور ان تمام افراد کو انصاف کے کٹہرے ميں کھڑا نہ کرے جنہوں نے رياستی دہشت گردی ميں حصہ ليا، وہ ہميں نا قابل قبول ہوگا۔‘‘ بيان ميں اس کے سوا کسی بھی صورت ’جنيوا ٹو‘ کانفرنس ميں شرکت کو خارج از امکان قرار ديا گيا ہے۔ اس اعلاميے پر باغيوں کے مجموعی طور پر بائيس سينئر اہلکاروں نے دستخط کيے، جن ميں سے زيادہ تر کا تعلق اسلام پسند گروہوں سے ہے۔

عرب ليگ کے سربراہ نبيل العربی نے کہا ہے کہ وہ توقع کرتے ہيں کہ ’جنيوا ٹو‘ کا انعقاد تئیس نومبر کو ہو پائے گا تاہم ابھی تک اقوام متحدہ، امريکا اور روس کا يہی کہنا ہے کہ تاحال مذاکرات کے ليے کوئی تاريخ حتمی طور پر طے نہيں کی گئی ہے۔

شام میں دو برس سے جاری خانہ جنگی کے دوران ڈیڑھ لاکھ سے زائد افراد ہلاک اور بیس لاکھ کے قریب لوگ نقل مکانی پر مجبور ہو چکے ہیں۔