سکیورٹی معاہدے پر اختلافات برقرار ہیں، ایمل فیضی

افغان حکومت کے ترجمان ایمل فیضی کے اس تازہ بیان سے ایسے امکانات پیدا ہو گئے ہیں کہ افغانستان میں نیٹو کے فوجی مشن کے اختتام پر وہاں تعینات تمام امریکی فوجی واپس وطن بلائے جا سکتے ہیں۔ یہ امر اہم ہے کہ دو برس قبل واشنگٹن اور بغداد کے مابین ایسے ہی اختلافات کے باعث عراق میں تعینات تمام تر امریکی فوجی واپس بلا لیے گئے تھے۔

گزشتہ ایک برس سے کابل اور واشنگٹن 2014ء کے بعد افغانستان میں امریکی افواج کی تعیناتی سے متعلق باہمی سکیورٹی کا معاہدہ (بی ایس اے) طے کرنے کی کوشش میں ہیں۔ رواں ماہ افغانستان کا دورہ کرنے والے امریکی وزیر خارجہ جان کیری نے کابل میں افغان صدر حامد کرزئی سے ملاقات کے بعد کہا تھا کہ اس معاہدے سے متعلق زیادہ تر نکات پر اتفاق رائے ہو گیا ہے تاہم افغانستان میں تعینات امریکی افواج کو استثنیٰ کے حوالے سے اختلافات برقرار ہیں۔ امریکا کی کوشش ہے کہ اگر کسی امریکی فوجی کو افغانستان میں کسی جرم کا مرتکب قرار دیا جاتا ہے تو اس کے خلاف امریکا میں مقدمہ چلایا جائے جبکہ افغان حکومت اس مطالبے کے خلاف ہے۔

خبر رساں ادارے روئٹرز نے ایمل فیضی کے حوالے سے بتایا ہے کہ جب جان کیری افغانستان کا دورہ کر رہے تھے تو اس معاملے کو مذاکرات کا حصہ نہیں بنایا گیا تھا۔ انہوں نے یہ بھی کہا کہ اس معاملے کے علاوہ بھی کئی اہم موضوعات ایسے ہیں، جن پر دونوں ممالک میں ابھی تک کوئی اتفاق نہیں ہو سکا ہے، ’’اس معاہدے پر کافی زیادہ کام کیا گیا ہے تاہم یہ ابھی تک حتمی نہیں ہے۔‘‘

ایمل فیضی کا کہنا تھا، ’’اگر ہم اس مسودے کو حتمی شکل نہ دے سکے تو اسے لویا جرگہ بھیج دیا جائے گا اور افغان عوام خود ہی اس مسئلے پر کوئی فیصلہ کریں گے۔‘‘ لویا جرگہ یا افغان قبائلی سرداروں کی اسمبلی نومبر میں متوقع طور پر اس معاہدے پر غور کرے گی۔ فیضی نے یہ بھی کہا کہ اگرچہ دونوں ممالک کو اس معاہدے کی ضرورت ہے تاہم افغانستان اس بارے میں جلد بازی نہیں کرنا چاہتا ہے، ’’ صدر (حامد کرزئی) نے کہا ہے کہ وہ اس معاہدے کو حتمی شکل دینے کی جلدی میں نہیں ہیں بلکہ افغانستان کی آئندہ حکومت بھی یہ کام کر سکتی ہے۔‘‘

واشنگٹن حکومت نے کہہ رکھا ہے کہ اگر افغانستان میں تعینات امریکی فوجیوں کو افغان قانون سے مستثنیٰ قرار نہیں دیا جاتا تو یہ ڈیل منسوخ کر دی جائے گی۔ اس ڈیل میں ایک اہم موضوع یک طرفہ امریکی فوجی کارروائی کا بھی ہے۔ فیضی کے بقول یہ معاملہ بھی ابھی تک حل طلب ہے۔ فیضی نے کہا، ’’افغان حکومت ایکشن لے گی۔۔۔ اگر امریکی فورسز یا ان کے اڈوں پر حملہ ہوتا ہے تو امریکی افواج کو جوابی حملے کا حق نہیں ہو گا۔ ہم کسی بھی یک طرفہ فوجی کارروائی کے خلاف ہیں۔‘‘

باعث اختلاف ایک معاملہ افغان افواج کی تربیت کا بھی ہے جب کہ آئندہ برس نیٹو فوجی مشن کے خاتمے کے بعد افغانستان میں امریکی فوجی اڈوں کی تعداد بھی زیر بحث ہے۔ ایمل فیضی نے روئٹرز کو بتایا، ’’ہم نے امریکا کو کہا ہے کہ وہ 9 فوجی اڈے رکھ سکتا ہے۔ اب لویا جرگہ کے پاس اختیار ہے کہ وہ اس تعداد کو کم کر دے یا اسے بڑھا دے۔‘‘

امریکا میں خیال کیا جا رہا ہے کہ سکیورٹی معاہدے کا مسودہ لویا جرگہ میں منظور کر لیا جائے گا۔ اس حوالے سے پیر کے دن امریکی وزیر دفاع چک ہیگل نے کہا تھا کہ اس معاہدے کے حوالے سے پیشرفت مثبت ہے۔