سولہ سالہ نسیم شاہ کی ہیٹ ٹرک، ایک نیا ریکارڈ

پاکستان اور بنگلہ دیش کی کرکٹ ٹیموں کے مابین راولپنڈٰی میں جاری ٹیسٹ میچ کے تیسرے دن نسیم شاہ نے بنگلہ دیشی بلے بازوں نجم الحسن، تیج الاسلام اور محمود اللہ کو مسلسل تین گیندوں پر آؤٹ کر کے ایک نیا ریکارڈ قائم کر دیا ہے۔

یوں تیسرے ٹیسٹ مچ میں پاکستانی کی نمائندگی کرنے والی نسیم شاہ ہیٹ ٹرک کرنے والے دنیا کے کم عمر ترین بولر بن گئے ہیں۔ پندرہ فروری کو وہ سترہ برس کے ہو جائیں گے۔

تیسرے دن کے اختتام پر بنگلہ دیش نے اپنی دوسری اننگز میں 126 رنز بنائے ہیں اور اس کے چھ کھلاڑی آؤٹ ہوئے۔ ان میں سے چار وکٹیں نسیم شاہ جب کہ دو وکٹیں لیگ اسپنر یاسر شاہ نے بٹوری ہیں۔ اس وقت بھی بنگلہ دیش پاکستان کی پہلی اننگز کے مقابلے میں 86 رنز کے خسارے میں ہے۔

پاکستان نے اپنی پہلی اننگز میں 445 رنز بنائے تھے، جن میں بابر اعظم اور شان مسعود کی شاندار سنچریاں شامل تھیں۔ شان مسعود نے سو رنز بنائے تھے جبکہ بابر اعظم 143 رنز بنانے میں کامیاب ہوئے تھے۔ ان کے علاوہ حارث سہیل نے 75 جبکہ اسد شفیق نے 65 رنز کی شاندار انفرادی اننگز کھیلی تھیں۔

اس ٹیسٹ میچ میں ٹاس جیت کر پاکستان نے پہلے بنگلہ دیشی ٹیم کو بلے بازی کی دعوت دی تھی۔ پاکستانی کپتان اظہر علی کا یہ فیصلہ درست ثابت ہوا اور بنگلہ دیش کی ٹیم پہلی اننگز میں صرف 233 رنز بنا کر ہی ڈھیر ہو گئی۔ راولپنڈی ٹیسٹ میں پاکستان کی پوزیشن مستحکم ہو گئی ہے۔