سفارتی کوششوں کو موقع دیا جائے، اوباما

باراک اوباما نے یہ بات منگل کو اپنے اسٹیٹ آف دی یونین خطاب میں کہی۔ انہوں نے کہا کہ امریکی سفارتی کوششوں اور پابندیوں کے نتیجے میں تہران حکومت ایک دہائی سے زائد عرصے میں پہلی مرتبہ اپنے نیوکلیئر پروگرام پر پیش رفت روکنے پر تیار ہوئی ہے۔

انہوں نے کہا: ’’قومی سلامتی کی خاطر، ہمیں سفارتی کوششوں کو کامیابی کا ایک موقع دینا ہو گا۔‘‘

خبر رساں ادارے ڈی پی اے کے مطابق امریکی صدر نے کہا کہ اس عمل میں ناکامی ہوئی تو وہ نئی پابندیوں کے لیے زور دیں گے۔ انہوں نے مزید کہا: ’’لیکن اگر ایران کے رہنما اس موقع سے فائدہ اٹھاتے ہیں، تو ایران پھر سے عالمی برادری کا حصہ بننے کی جانب اہم قدم اٹھا سکتا ہے، اس طرح ہمیں بھی جنگ کے خطرے کے بغیر اس دور میں سلامتی کے حوالے سے درپیش ایک بڑے مسئلے کو حل کرنے کا موقع ملے گا۔‘‘

اوباما نے یہ بھی کہا: ’’حقیقت یہ ہے کہ خطرہ موجود ہے۔‘‘

خبر رساں ادارے اے ایف پی کے مطابق انہوں نے زور دیا کہ بدلتے ہوئے عالمی خطرات کے تناظر میں امریکا کو چوکس رہنا ہو گا۔ انہوں نے مزید کہا: ’’میرا پختہ یقین ہے کہ ہماری قیادت اور ہماری سکیورٹی صرف فوج پر انحصار نہیں کر سکتی۔ پیچیدہ خطرات کی دنیا میں ہماری سکیورٹی اور قیادت ہمارے اختیار میں موجود تمام عناصر پر انحصار کرتی ہے، جس میں مضبوط اور بااُصول سفارتی کوششیں بھی شامل ہیں۔‘‘

اس خطاب میں انہوں نے خارجہ پالیسی کے دیگر پہلوؤں اور کیوبا میں قائم امریکی حراستی مرکز گوآنتاناموبے پر بھی بات کی۔ انہوں نے کہا کہ گوآنتانامو بے کا قید خانہ اس سال بند کر دیا جانا چاہیے۔ خبر رساں ادارے روئٹرز کے مطابق انہوں نے افغانستان میں فوجیوں کی مزید تعیناتی کا ذکر نہیں کیا تاہم یہ کہا کہ کو مستقل جنگ ختم کر دینی چاہیے۔

امریکا کے داخلی امور پر بات کرتےہوئے انہوں نے ایک مرتبہ پھر امریکی سرحدوں کو محفوظ بنانے پر بھی زور دیا۔ ان کا کہنا تھا کہ اس کا مقصد ان لوگوں کے خلاف کارروائی کرنا ہے جو غیرقانونی تارکین وطن کو شہریت دلانے کی پیش کش کرتے ہوئے نوکریاں دیتے ہیں۔

اوباما کا کہنا ہے کہ اس شعبے میں اصلاحات سے ملازمتوں کے ہزاروں مواقع پیدا ہوں گے اور آئندہ دو دہائیوں میں معیشت کو ایک ٹریلین ڈالر کا فائدہ پہنچے گا۔

ملکی سطح پر انہوں نے اپنی ہیلتھ کیئر کی اصلاحات کا دفاع کیا۔ باراک اوباما کا کا کہنا تھا کہ وہ ووٹروں کے حقوق کے لیے اور گن کے استعمال کے ذریعے تشدد کے خلاف کام جاری رکھیں گے۔