سالانہ شرح پیداوار کا معاملہ جون سمٹ کے ایجنڈے پر ہے، میرکل

جرمنی کے روزنامہ لائپزیگر فولکس سائٹُنگ (Leipziger Volkszeitung) کو انٹرویو دیتے ہوئے جرمن چانسلر انگیلا میرکل کا کہنا تھا کہ جون میں ہونے والی یورپی یونین کی سمٹ میں طے شدہ بجٹ پر ہونے والے سمجھوتے پر کوئی بات نہیں کی جائے گی۔ میرکل کے مطابق سربراہ اجلاس کے ایجنڈے پر کئی موضوعات ہیں لیکن ان میں ایک خاصی اہمیت کا حامل ہے اور یہ رکن ملکوں کی سالانہ شرح پیداوار سے منسلک ہے۔ جرمن چانسلر نے فعال یورپی سرمایہ کاری بینک کی ضرورت پر بھی زور دیا۔

میرکل سے پوچھا گیا کہ کیا سالانہ شرح افزائش کے تناظر میں حکومتوں کو خاص احتیاطی اقدامات کا سامنا کرنا پڑے گا تو انہوں نے کہا کہ یہ معاملہ گزشتہ سال سے یورپی یونین کی نشستوں میں اٹھایا جاتا رہا ہے۔ میرکل کے مطابق کئی سربراہی اجلاسوں میں اس معاملے پر مثبت گفتگو کی جا چکی ہے۔ میرکل کا یہ خاص طور پر کہنا تھا کہ سالانہ شرح نمو کی مناسبت سے ایجنڈے کی تیاری کی جا رہی ہے۔

فرانس کے صدارتی انتخابات کے پہلے مرحلے میں زیادہ ووٹ حاصل کرنے والے سوشلسٹ پارٹی کے امیدوار فرانسوا اولانڈ نے اپنی انتخابی مہم میں کہا تھا کہ وہ یونین کے بجٹ معاہدے پر از سرنو بات چیت شروع کریں گے۔ جرمن چانسلر نے ان امکانات کو مسترد کر دیا کہ مستقبل میں پہلے سے طے پانے والے بجٹ معاہدے کے مختلف نکات پر دوبارہ گفتگو کی جائے گی۔ میرکل نے واضح طور پر کہا کہ بجٹ ڈیل پر پچیس رکن ملکوں کے سربراہوں کے دستخط موجود ہیں اور اس پر قطعاً نئے مذاکراتی عمل کی ضرورت نہیں ہے۔ جرمن چانسلر کے مطابق بجٹ معاہدے کو پرتگال اور یونان کی جانب سے توثیق حاصل ہو چکی ہے اور آئر لینڈ میں منظوری کے لیے مئی میں ریفرنڈم ہوگا۔

یورپی یونین میں سالانہ شرح نمو کی مناسبت سے یورپی مرکزی بینک کے سربراہ ماریو دراگی کا یہ بیان پہلے ہی ہلچل پیدا کر چکا ہے کہ یورو زون ملکوں کے سالانہ شرح ترقی کے اعداد و شمار کو مالیاتی اعدادوشمار کے ساتھ پرکھا جا سکتا ہے۔ اس باعث یورو زون کے کئی ملک بجٹ خسارے کو کنٹرول کرنے کے لیے منتخب حکومتوں کے تجویز کردہ سخت اقدامات کی شدت کے باعث بڑھتی مشکلات میں اضافے کو محسوس کرنے لگے ہیں۔

اس دوران، اٹلی کے وزیر اعظم ماریو مونٹی اور یورپی کمیشن کے صدر باروسو نے اسی جمعے کے روز حکومتوں کو خبردار کیا کہ سالانہ شرح نمو کو جن احتیاطی اقدامات کا سامنا ہو سکتا ہے، اس باعث حکومتوں پر قرضے کے بوجھ میں اضافے کا قوی امکان ہے۔ مونٹی اور باروسو نے اس پر اتفاق کیا ہے کہ اقتصادی معاملات میں مسابقتی عمل کو بہتر کرنے سے ہی سالانہ شرح افزائش کو مناسب خطوط پر بحال کیا جا سکتا ہے۔

ah/ng (AFP)