زہریلی گیس کے حملے سے متعلق خفیہ امریکی دستاویزات

واشنگٹن سے موصولہ تازہ ترین اطلاعات کے مطابق امریکا نے اعلان کیا ہے کہ آج جمعے کے روز شام میں کیمیائی ہتھیاروں کے مبینہ استعمال کی غیر مرتب شدہ دستاویزات جاری کی جائیں گی تاہم اس رپورٹ میں یہ نہیں بتایا کہ یہ دستاویزات کب جاری کی جائیں گی۔

امریکا شام پر حملے کے لیے تاحال عالمی برادری کی واضح حمایت حاصل کرنے سے محروم رہا ہے۔ اس وقت فرانس کے علاوہ کوئی بھی ایسا قابل ذکر ملک موجود نہیں ہے جو شام پر حملے کی حمایت کر رہا ہو۔

اُدھر اٹلی نے بھی خبردار کیا ہے کہ شام پر عالمی برداری کی حمایت کے بغیر کیا گیا کوئی بھی حملہ عالمی امن کے لیے نقصان دہ ہوگا۔

شام پر حملے کے لیے عالمی حمایت حاصل کرنے کی امریکی کوششوں کو اس وقت شدید دھچکا لگا، جب برطانوی پارلیمنٹ نے اس منصوبے کو مسترد کردیا۔

گزشتہ روز برطانوی پارلیمان نے بشارالاسد حکومت کے خلاف فوجی کارروائی میں امریکا کا ساتھ دینے سے متعلق ایک حکومتی درخواست مسترد کر دی تھی۔

شام کے خلاف کارروائی کے لیے کوئی بین الاقوامی اتحاد بنانے میں مشکلات کے باوجود امریکی صدر باراک اوباما اور ان کے مشیروں کا کہنا ہے کہ امریکا شام کے خلاف اپنے طور پر بھی کوئی کارروائی کر سکتا ہے۔

واضح رہے کہ گزشتہ ہفتے شامی دارالحکومت دمشق کے نواح میں ایک مبینہ کیمیائی حملے کے بعد امریکا، برطانیہ اور فرانس نے بشارالاسد حکومت کو سنگین نتائج کی دھمکی دی تھی۔

برطانوی پارلیمنٹ میں ناکامی کے بعد ڈیوڈ کیمرون کا کہنا تھا، ’’پارلیمنٹ کے فیصلے سے مجھ پر یہ واضح ہو گیا ہے کہ برطانوی عوام شام کے خلاف فوجی کارروائی کے خلاف ہیں۔ حکومت پارلیمنٹ کے فیصلے کا احترام کرتے ہوئے اقدامات اٹھائے گی۔ ‘‘

فرانسیسی صدر فرانسوا اولاند نے کہا ہے کہ برطانوی پارلیمان کی جانب سے شام کے خلاف کسی فوجی کارروئی کی مخالفت سے فرانس کے اس بابت ارادے میں تبدیلی نہیں آئی گی۔ اولاند کے بقول فرانس کیمیائی ہتھیاروں کے استعمال پر بشارالاسد حکومت کے خلاف کارروائی کے ارادے پر قائم رہے گا۔ فرانسوا اولاند نے ایک فرانسیسی اخبار کو دیے گئے اپنے انٹرویو میں مزید کہا کہ وہ شامی حکومت کی جانب سے اس حملے پر اسے ’سزا‘ دینا چاہتے ہیں، کیوں کہ اس سے شامی شہریوں کو ’ناقابل تلافی‘ نقصان اٹھانا پڑا ہے۔ انہوں نے کہا کہ فرانس برطانیہ کے بغیر بھی ایسی کارروائی کر سکتا ہے۔

ترک وزیرخارجہ احمد داؤود اوگلو نے آج جاری کئے گئے ایک بیان میں کہا ہے کہ خفیہ ذرائع سے حاصل ہونے والی معلومات کے مطابق اس بات میں کوئی شک نہیں کہ اسد فورسز نے شام میں کیمیائی ہتھیار استعمال کئے ہیں۔

پولینڈ کے وزیر خارجہ نے شام میں کیمائی ہتھیاروں کے استعمال کا الزام روس پر عائد کیا ہے، پولستانی وزیر خارجہ نے کہا شام میں جس طرح کے کیمائی ہتھیار استعمال ہوئے ہیں اس سے لگتا ہے کہ ان حملوں کے پیچھے روس کا ہاتھ ہے

دوسری طرف شام نے اعلان کیا ہے کہ وہ اقوام متحدہ کی کسی بھی ایسی رپورٹ کو مسترد کردے گا جو جانبداری سے مرتب کی گئی ہوگی۔