روس مغرب کے طرز عمل سے بلیک میل نہیں ہوگا: پوٹن

پوٹن کا یہ دورہ غیر معمولی اہمیت کا حامل ہے کیونکہ یہ یورپی اتحاد کا حصہ بننے کی خواہش اور دوسری جانب ایک عالمی طاقت اور پرانے ساتھی روس کا ساتھ نہ چھوڑنے کی کوشش کی کشمکش میں مبتلا سربیا کے لیے ایک علامتی موقع ہے۔

روسی صدر ولا دیمیر پوٹن جب بلغراد پہنچے تو اُن کا استقبال سربیا کے صدر ٹومیسلاؤ نیکولچ نے ریڈ کارپٹ پر شاندار طریقے اور مکمل ملٹری اعزاز کے ساتھ کیا۔ جس کے بعد دونوں صدور ایک سرکاری گاڑی میں اُس قبرستان گئے جہاں اکتوبر 1944 ء میں بلغراد کو نازیوں کے قبضے سے آزاد کرانے کی جنگ لڑنے والے روسی فوجی دفن ہیں۔ اُن روسی فوجیوں کی قبروں پر دونوں لیڈروں نے پھول چڑھاتے ہوئے انہیں خراج عقیدت پیش کیا۔ بلغراد ہوائی اڈے سے شہر کے مرکز کو جانے والی شاہراہ سربیا اور روس کے پرچموں سے آراستہ کی گئی ہے۔ اور ہر سرکاری عمارت پر دونوں ملکوں کے جھنڈے لہرا رہے ہیں۔ بلغراد کی جن سڑکوں سے روسی صدر کا قافلہ گزرنا تھا اُس کی سکیورٹی بہت سخت کر دی گئی تھی اور متعدد کنڈر گارٹنز اور اسکولوں میں آج تعطیل تھی۔

سربیا کے صدر نیکولچ نے روسی صدر ولادیمیر پوٹن کو ایک اعزازی تمغے یا میڈل آف آنر سے بھی نوازا۔ پوٹن نے بلغراد میں ہونے والی ملٹری پریڈ کے بعد خطاب بھی کیا۔ روس کا تاریخی اتحادی سربیا گرچہ یورپی بلاک کا حصہ بننے کا متمنی ہے تاہم یوکرائن کے تنازعے کے سبب روس پر یورپی یونین کی طرف سے لگائی جانے والی پابندیوں کا ساتھ دینے سے بلغراد نے انکار کر دیا ہے۔ دوسری جانب روس کوسوو کی آزادی کی سربیا کی طرف سے کی جانے والی مخالفت کی پشت پناہی کر رہا ہے۔

روسی صدر ولادیمیر پوٹن نے اپنے امریکی ہم منصب باراک اوباما پر روس کے ساتھ معاندانہ سلوک روا رکھنے کا الزام عائد کیا ہے۔ پوٹن نے کہا کہ وہ پوکرائن کے معاملے میں مغرب کے طرز عمل سے بلیک میل نہیں ہوگا۔ روسی صدر نے یہ بیانات سربیا پہنچنے سے کچھ ہی دیر پہلے سربیا کے ایک اخبار کو انٹرویو دیتے ہوئے دیے۔ پوٹن نے گزشتہ ماہ اقوام متحدہ کی جنرل اسمبلی سے امریکی صدر باراک اوباما کے خطاب کے حوالے سے کہا کہ اوباما کے بیان کو روس کے ساتھ دشمنی کے اظہار کے سوا اور کچھ نہیں کہا جا سکتا۔ اوباما نے اپنے اُس خطاب میں روس کی مشرقی یوکرائن میں پیش قدمی کو دورِ حاضر کے سب سے بڑے عالمی خطرے سے تعبیر کیا اور اوباما کے بقول اس فہرست میں دوسرا نمبر اسلامک اسٹیٹ اور تیسرا ایبولا وائرس کا ہے۔ اس پر رد عمل کا اظہار کرتے ہوئے پوٹن کا سربیا کے روزنامہ پولیٹیکا کو بیان دیتے ہوئے کہنا تھا، ’’ہمیں امید ہے کہ ہمارے ساتھی ممالک روس کو بلیک میل کرنے کی ناپختہ کوششوں کو سمجھ رہے ہیں اور انہیں یہ نہیں بھولنا چاہیے کہ بڑی جوہری طاقتوں کے مابین اختلافات اسٹریٹیجک استحکام پر کیسے اثرات مرتب کر سکتے ہیں۔‘‘

پوٹن نے گزشتہ چند ماہ سے مغرب کی طرف سے روس کو عالمی سطح پر تنہا کرنے کی کوششوں کو لغو قرار دیا۔ انہوں نے کہا کہ یہ فریب آمیز مقصد ہے جو کبھی پورا نہیں ہو سکتا۔ ساتھ ہی پوٹن نے واشنگٹن پر روس کے اندرونی معاملات میں مداخلت کا الزام بھی عائد کیا۔

روسی صدر آج جمعرات کو دیر گئے اطالوی شہر میلان کے لیے روانہ ہو جائیں گے جہاں وہ ایشیائی اور یورپی ممالک کی سربراہی کانفرنس ASEM میں شرکت کریں گے۔ کل جمعے کے روز ان کی یوکرائنی صدر پیٹرو پورو شینکو کے ساتھ ملاقات طے ہے۔