دوستانہ فٹ بال میچ: جرمنی نے ایکواڈور کو شکست دے دی

اس میچ کا پہلا گول کھیل کے دسویں ہی سیکنڈ میں ہو گیا جو فٹ بال کی تاریخ میں مختصر ترین وقت میں گول اسکور کیے جانے کا ایک ریکارڈ ہے۔

یہ گول جرمنی کے فارورڈ کھلاڑی لوکاس پوڈولسکی نے کیا۔ واضح رہے کہ پوڈولسکی کو جرمن قومی ٹیم میں پہلے گیارہ کھلاڑیوں میں جگہ بنانے میں کچھ مشکل رہی ہے لیکن ایکواڈور کے خلاف میچ میں ریکارڈ ساز گول کے ذریعے انہوں نے ٹیم میں اپنی موجودگی کا زبردست طریقے سے احساس دلایا۔

کھیل شروع ہی ہوا تھا کہ پوڈولسکی نے پلک جھپکتے ہی ایکواڈور کے سینٹرل دفاعی کھلاڑی گابریئل آخیلیئر سے بال چھینی اور ماکسیمو بانگیورا کو چکما دیتے ہوئے گول کر ڈالا۔

کھیل کے چوبیسویں منٹ تک جرمنی کی جانب سے بائر لیور کوزن کے لارس بینڈر اور پوڈولسکی نے دو دو گول کر کے مجموعی اسکور چار کر دیا تھا۔ یوں دنیا کی دوسرے نمبر کی ٹیم نے دسویں نمبر کی ٹیم ایکواڈور کو کھیل کی ابتدا میں ہی ہلا کر رکھ دیا تھا۔

اس کے بعد جرمن کھلاڑی کوئی گول نہ کر سکے جبکہ ایکواڈور کے کھلاڑی دو گول کرنے میں کامیاب رہے۔

بعدازاں جرمن ٹیم کے کوچ یوآخم لوو نے اے آر ڈی ٹیلی وژن سے گفتگو میں کہا: ’’میں جانتا ہوں کہ ٹیم میں پندرہ یا بیس سے زائد کھلاڑیوں کی ضرورت ہے۔ یہ میچ نوجوانوں کے لیے تجربہ حاصل کرنے کا بہترین موقع ہیں۔ انہوں نے پہلے ہاف میں زبردست کارکردگی دکھائی۔‘‘

کھیل کے اختتام پر پوڈولسکی کا کہنا تھا: ’’ہم کھیل کے آغاز سے ہی دباؤ قائم کرنا چاہتے تھے۔ میں کچھ خوش قسمت رہا (پہلے گول کے ساتھ) اور خوش بھی کہ گول ہو گیا۔ ہم نے پہلے ہاف میں بہت اچھا کھیل پیش کیا لیکن آپ نے دوسرے ہاف میں دیکھا کہ ایکواڈور ایک اچھی ٹیم ہے۔‘‘

اب جرمنی اتوار کو امریکا کے خلاف واشنٹگن میں ایک میچ کھیلے گا۔ امریکی ٹیم کے کوچ یورگن کلینزمن ہیں جو 2006ء میں جرمن ٹیم کے کوچ بھی رہ چکے ہیں۔

ng/ai(dpa)