دنیا کے متعدد ممالک اپنے شہریوں کے خلاف جبر میں ملوث، رپورٹ

امریکہ میں قائم ایک جمہوری تحقیقاتی گروپ فریڈم ہاؤس نے اپنی ایک تازہ رپورٹ میں کہا ہے کہ دنیا کے ممالک کی ایک بڑھتی ہوئی تعداد اختلاف رائے کو خاموش کرانے کے لیے بیرونی ممالک میں مقیم اپنے شہریوں کے اغوا ان پر تشدد اور ملک بدریوں میں ملوث ہے۔ اس رپورٹ کے مطابق چین ان خلاف ورزیوں کا سب سے زیادہ مرتکب ہے۔

 فریڈم ہاؤس نے اپنی رپورٹ میں 2014ء سے لے کر اب تک 38ممالک کی جانب سے ''بین الاقوامی جبر‘‘ کے 850 سے زائد کیسوں کی نشاندہی کی ۔ اس  رپورٹ میں کہا گیا ہے کہ سن 2022 میں 20 حکومتیں جبر کی ان کارروائیوں میں ملوث پائی گئیں، جن میں پہلی بار بنگلہ دیش اور جبوتی بھی  شامل ہیں۔

رپورٹ میں کہا گیا ہے کہ سن 2014ء سے لے کر اب تک کے تمام کیسز میں سے 30 فیصد کے لیے چین کی حکومت ذمہ دار ہے۔ بیجنگ کی ان کارروائیوں میں ایغور مسلمان اقلیت کے ارکان کو زبردستی ملک واپسی کے لیے دیگر ممالک پر دباؤ ڈالنے کی کوششیں شامل ہیں۔ امریکہ چین کو ایغوروں کی نسل کشی کی مہم کا زمہ دار ٹھہراتا ہے۔ بیجنگ اس الزام کی تردید کرتا ہے۔

 فریڈم ہاؤس کے صدر مائیکل ابرامووٹز نے کہا، ''اس مسئلے کے بارے میں بڑھتی ہوئی آگاہی کے باوجود زیادہ آمرانہ حکومتیں بیرون ملک مقیم اپنے شہریوں اور جلاوطن کمیونٹیز پر اپنا کنٹرول قائم کرنے کی کوشش کر رہی ہیں۔‘‘ رپورٹ میں سفارش کی گئی ہے کہ حکومتیں بین الاقوامی جبر کو روکنے کے لیے اس کے مرتکب ممالک کے خلاف پابندیاں عائد کرنے اور ان کی سکیورٹی امداد محدود کرنے سمیت دیگر اقدامات کے لیے منصوبہ بندی کریں۔

 رپورٹ کے مطابق چین کے بعد سرفہرست ریاست ترکی  ہے، جس نے  سن 2016 میں صدر رجب طیب ایردوآن کے خلاف بغاوت کی کوشش کے بعد سے اپنے جلاوطن شہریوں کا تعاقب شروع کر رکھا ہے اور اس سلسلے میں کئی لوگوں کی حوالگی کے لیے سویڈن کی نیٹو رکنیت کو استعمال کرنے کی کوشش بھی کی تاہم انقرہ کو ابھی تک اپنےاس مقصد میں کامیابی حاصل نہیں ہو سکی۔ 

رپورٹ میں مزید کہا گیا ہے کہ جبر کے زیادہ تعداد میں کیسز والی دوسری قوموں میں روس شامل ہے، جس نے یوکرین کی جنگ کی وجہ سے فرار ہونے والے شہریوں کی تلاش کے لیے خاص طور پر قازقستان کا رخ کیا ہے۔ اس کے ساتھ ساتھ  تاجکستان نے ماسکو کی جانب سے علیحدگی پسندی کے الزام میں پامیری کمیونٹی کے  ارکان کی ملک بدری کے لیے کام کیا۔

اس رپورٹ میں مصر کی طرف بھی اشارہ کیا گیا، جس نے مصری اور امریکی دوہری شہریت کے حامل ایک شخص کی حوالگی کا مطالبہ کیا، جسے مصر میں احتجاج کی کال دینے کے بعد دبئی میں گرفتار کیا گیا تھا۔ اماراتی حکام نے اس شخص کو سات ہفتے بعد رہا کر دیا۔ بیلاروس، ایران اور روانڈا پر بھی بین الاقوامی  جبر کے واقعات کی  پشت پناہی کا الزام ہے۔

 بنگلہ دیش کو ملائیشیا میں اس کے سابق سفیر کے معاملے میں شامل کیا گیا ہے، جنھوں نے ڈھاکہ میں اقتدار کی تبدیلی کے بعد وطن واپس آنے سے انکار کر دیا تھا اور اسے ملائشیا کے حکام نے مختصر وقت کے لیے حراست میں رکھا تھا۔

ش ر/ اب ا ( اے ایف پی)