حماس اور اسرائیل میں شدید ترین جھڑپیں

اسرائیلی سکیورٹی ذرائع کا کہنا ہے کہ بدھ کی شام کو غزہ سے ایک راکٹ جنوبی اسرائیلی شہر سدیروت کے ایک باغ میں گرا، لیکن اس میں کوئی جانی نقصان نہیں ہوا۔ اسرائیل نے جمعرات کو علی الصبح وسطی غزہ پرجوابی حملہ کیا اور تقریباً ایک درجن راکٹ داغے۔ جس کے بعد فلسطینی عسکریت پسند گروپ حماس کی جانب سے اسرائیل کی جانب چار راکٹ داغے گئے۔

اسرائیلی فوج کا کہنا ہے کہ اس کے جنگی طیاروں نے غزہ میں ایک عسکری چوکی اور ایک سرنگ میں قائم کمپلکس کو نشانہ بنایا، جہاں راکٹ انجنوں کی تیاری کے لیے خام کیمیائی مواد موجود تھا۔

غزہ پر حکمرانی کرنے والے حماس نے کہا کہ اس نے اسرائیلی طیاروں پر زمین سے فضا میں مار کرنے والے راکٹوں سے فائر کیا۔

یہ تازہ ترین جھڑپ ایک ایسے وقت ہوئی ہے جب مسجد اقصیٰ کا احاطہ فلسطینیو ں اور اسرائیل کے درمیان تقریباً ایک ماہ سے تنازع کا مرکز بنا ہوا ہے۔

جھڑپوں کا سلسلہ جاری

حماس اور اسرائیلی فورسز کے درمیان ہونے والی اس تازہ ترین جھڑپ سے چند گھنٹے قبل اسرائیلی پولیس نے انتہائی شدت پسند یہودیوں کے ایک ہجوم کو مشرقی یروشلم  کے پرانے شہر میں مسلم اکثریتی علاقوں تک پہنچنے سے روک دیا تھا۔ پولیس نے یہ قدم چار ہفتوں سے جاری جھڑپوں کے بعد بڑھتے ہوئے تشدد کو ختم کرنے کے مقصد سے اٹھایا تھا۔ ان جھڑپوں میں اب تک کم از کم 36 افراد ہلاک ہوچکے ہیں۔

گزشتہ برس میں انتہائی کٹرمذہبی یہودیوں کی جانب سے پرانے شہر میں مظاہرے کے لیے اسی طرح کی اپیل کی گئی تھی جس کے بعد حماس اور اسرائیل کے درمیان جھڑپوں کا سلسلہ شروع ہوا جو گیارہ روزہ جنگ میں تبدیلی ہوگئی تھی۔

بدھ کی شام کو ایک ہزار سے زائد شدت پسند یہودی مظاہرین اسرائیلی پرچم لہراتے ہوئے جمع ہوئے۔ ان میں کچھ 'عرب مردہ باد' کے نعرے لگارہے تھے۔ لیکن پولیس نے انہیں دمشق گیٹ اور پرانے شہر کے مسلم علاقوں تک پہنچنے سے روک دیا۔

انتہائی دائیں بازو سے وابستہ متناز ع قانون ساز اتمار بین گویر نے مظاہرین کی قیادت کی۔انہوں نے بدھ کے روز وزیر اعظم نیفتالی بینیٹ کی جانب سے دمشق گیٹ علاقے میں مظاہروں پر روک لگانے کے اعلان کی نکتہ چینی بھی کی۔

بین گویر نے فرانسیسی خبر رساں ایجنسی اے ایف پی سے بات کرتے ہوئے کہا، "میں یہ واضح طورپر کہنا چاہتا ہوں کہ میں آرام سے بیٹھنے والا نہیں ہوں۔" اس کے جواب میں ان کے حامیوں نے 'بینیٹ گھر جاو' کے نعرے بلند کیے۔ گویر کا کہنا تھا،" آخر مجھے کس قانون کے تحت دمشق گیٹ میں داخل ہونے کی اجازت نہیں ہے؟ 

بینیٹ نے قبل ازیں ایک بیان میں کہا تھا کہ انہوں نے سکیورٹی وجوہات کی بنا پر مارچ کو روک دیا ہے۔ ان کا کہنا تھا، "میرا ایسا کوئی ارادہ نہیں کہ چھوٹی چھوٹی سیاست کے لیے انسانی جانوں کو خطرے میں ڈالنے کی اجازت دی جائے۔"

بین گویر نے جمعرات کو اس کا جواب دیتے ہوئے کہا،"کچھ یہودی حماس کے سامنے ہتھیار نہیں ڈالتے۔"

کشیدگی میں اضافہ

حماس اور اسرائیل کے درمیان کشیدگی میں مسلسل اضافہ ہورہا ہے۔ یہ صورت حال ایسے وقت ہے جب یہودی 'پاس اوور'کا تہوار منارہے ہیں اور مسلمان مقدس ماہ رمضان کے روزے رکھ رہے ہیں۔

فلسطینیوں اور اسرائیلی عربوں نے مارچ کے اواخر اور اپریل کے اوائل میں اسرائیل میں چار حملے کیے جن میں 14افراد ہلاک ہوگئے۔

 دوسری طرف 22مارچ کے بعد سے اسرائیلی حملوں میں اب تک 23فلسطینی ہلاک ہوچکے ہیں۔ منگل کے روز اسرائیل نے کئی مہینوں بعد غزہ پر اپنا پہلا فضائی حملہ کیا تھا۔

اقو ام متحدہ کے سکریٹری جنرل انٹونیو گوٹریش نے تشدد کے واقعات پر تشویش کا اظہار کرتے ہوئے کہا، "یروشلم میں بگڑتی ہوئی صورت حال پر انہیں شدید تشویش ہے۔" انہوں نے بتایا کہ وہ فریقین کے رابطے میں ہیں اور"انہیں کشیدگی کو کم کرنے اور اشتعال انگیز کارروائیوں سے اجتناب کرنے کے لیے آمادہ کرنے" کی کوشش کررہے ہیں۔

ج ا/ ص ز (اے ایف پی، اے پی، روئٹرز)