حزب اللہ شامی اسلحے کی منتظر

لبنانی ریڈیو النور کی 25 ویں سالگرہ کے موقع پر خطاب کرتے ہوئے حزب اللہ کے سربراہ شیخ حسن نصراللہ کا کہنا تھا، ’’ہم شامی اسلحہ وصول کرنے کے لیے تیار ہیں‘‘۔ انہوں نے مزید کہا کہ ان کی تنظیم میں یہ صلاحیت موجود ہے کہ وہ اس اسلحے کو حفاظت سے رکھ سکتی ہے،’’ہم اسلحے کو اپنے لوگوں کے دفاع کے لیے استعمال کریں گے‘‘۔

اس حوالے سے امریکی حکام کہنا ہے کہ اسرائیل نے گذشتہ اختتام ہفتہ پر دمشق کے نواح میں جس قافلے کو نشانہ بنایا تھا، اس کے ذریعے شام سے اسلحہ حزب اللہ کو منتقل کیا جا رہا تھا۔ حزب اللہ کو خطے میں بشار الاسد کا سب سے بڑا اتحادی سمجھا جاتا ہے۔

اپنے اس خطاب میں حسن نصراللہ نے واضح الفاظ میں کہا کہ اسرائیل کی جانب سے اس حالیہ بمباری کا مقصد اسد حکومت کو متنبہ کرنا تھا۔ ان کا مزید کہنا تھا،’’حزب اللہ کی مدد کی صورت میں اسرائیل اسد حکومت کو ختم کرنا چاہتا ہے‘‘۔ نصراللہ نے مزید کہا، حالیہ تنازعے میں اسرائیل بنیادی طور پر شام کو کمزور کرنا چاہتا ہے۔

اسرائیل بارہا یہ بات واشگاف الفاظ میں کہہ چکا ہے کہ شیعہ تنظیم حزب اللہ کو ایران سے امداد اور تربیت فراہم کی جاتی ہے اور اسرائیل اُس تک کسی بھی قسم کے ہتھیار نہیں پہنچنے دے گا۔ 2006ء میں حزب اللہ نے 33 روز تک اسرائیل سے جنگ کی تھی۔ نصرا للہ نے اس عزم کا اظہار کیا کہ وہ گولان کی پہاڑیاں آزاد کرا کر پھر سے شام کے حوالے کریں گے۔ اسرائیل نے 1967ء کی عرب اسرائیل جنگ کے دوران گولان کی پہاڑیوں پر قبضہ کر لیا تھا۔

اس سے قبل ایک لبنانی اخبار میں بشار الاسد کا ایک بیان شائع ہوا تھا، جس میں کہا گیا تھا:’’2011ء میں شامی حکومت کے خلاف بغاوت شروع ہونے کے بعد حزب اللہ نے جس طرح اسد حکومت کی مدد کی ہے، اُس کے بدلے میں وہ حزب اللہ کو ’’سب کچھ دینے کے لیے تیار ہیں‘‘۔ لبنانی جریدے ’الاخبار‘ نے بشار الاسد کا ایک بیان شائع کیا ہے، جس میں انہوں نے کہا ہے، ’’شام اور لبنان کے مقاصد ایک ہی ہیں‘‘۔

zb/aa(dpa)