جماعت اسلامی انتخابات کے لیے نااہل، بنگلہ دیشی ہائی کورٹ

ہائی کورٹ کے سہ رکنی پینل نے جماعتِ اسلامی کے خلاف فیصلہ سناتے ہوئے کہا کہ سیاسی جماعت سیکولرزم کی مخالف ہے اور یہ دستور میں موجود سیکولرزم کے شق کے منافی ہے۔ بنگلہ دیشی ہائی کورٹ میں چار سال قبل شہریوں کے ایک گروپ کی جانب سے ایک پٹیشن دائر کی گئی تھی کہ الیکشن کمیشن میں جماعت اسلامی کی رجسٹریشن کو منسوخ قرار دیا جائے کیونکہ یہ ملک میں اسلامی شریعت کے قوانین کو متعارف کروانا چاہتی ہے۔ اس دوران فریقین کی جانب سے دلائل دینے کا سلسلہ جاری رہا۔

بنگلہ دیشی ہائی کورٹ کے تین ججوں پر مشتمل بینچ میں شامل سینیئر جج معظم حسین نے جماعت اسلامی کی رجسٹریشن کو غیر قانونی قرار دیتے ہوئے مختصر فیصلہ سنایا۔

عدالتی فیصلہ سنانے کے موقع پر سکیورٹی کے سخت انتظامات کیے گئے تھے۔ ہائی کورٹ کی جانب سے جو فیصلہ سامنے آیا ہے، اس حوالے سے بنگلہ دیشی الیکشن کمیشن نے کہا ہے کہ اب اگلے برس جنوری میں ہونے والے عام انتخابات میں جماعت اسلامی شرکت نہیں کر سکتی۔

الیکشن کمیشن کے وکیل شاہ دین ملک کا کہنا ہے کہ الیکشن میں جماعت اپنے امیدوار نہیں کھڑے کر سکے گی۔ شاہ دین ملک کا یہ بھی کہنا ہے کہ جماعت اسلامی اپنی دیگر سیاسی سرگرمیاں جاری رکھ سکتی ہے اور اگر یہ اپنے پارٹی منشورمیں ملکی دستور کے مطابق ترمیم کرتی ہے تو وہ دوبارہ پارٹی کی رجسٹریشن کے لیے درخواست دے سکتی ہے۔

عدالتی فیصلے کے حوالے سے جماعت اسلامی کے دفاعی وکیل تاج الاسلام کا کہنا ہے کہ وہ سپریم کورٹ میں فیصلے کے خلاف اپیل کریں گے۔ عدالت میں جماعت اسلامی کے وکلا کے پینل میں شامل ایک اور وکیل نے عدالتی فیصلے کو غیر جانبدار اور حکومتی پریشر کا نتیجہ قرار دیا۔

اسی طرح جماعت کے ایک سینیئر رہنما عبداللہ طاہر کا کہنا ہے کہ عدالتی فیصلہ ان کے پارٹی کے لیے ایک شاک کے مترادف ہے اور ہائی کورٹ کے تین ججوں نے وزیراعظم حسینہ شیخ کی سیکولر حکومت کے دباؤ کے سامنے سر جھکایا ہے۔ طاہر کا مزید کہنا ہے کہ وہ اور ان کے ساتھی عدالت کا فیصلہ سن کر صدمے سے دوچار ہو گئے تھے۔ طاہر کے مطابق ہائی کورٹ کے فیصلے سے ملک میں مزید عدم استحکام پیدا ہو گا۔ عبداللہ طاہر نے نئے مظاہروں کا جلد اعلان کرنے کا بھی عندیہ دیا ہے۔

یہ امر اہم ہے کہ سن 1971 میں جماعت اسلامی نے پاکستان کی حمایت کرتے ہوئے آزادی کی جنگ کی مخالفت کی تھی۔ سن 2010 سے اس پارٹی کو حکومتی دباؤ کا سامنا ہے جب حکومت کی جانب سے سن 1971میں انسانیت کے خلاف جرائم کے الزامات کے تحت جماعت اسلامی کے رہنماؤں کے خلاف مقدمات شروع کرنے کا اعلان کیا تھا۔