’گھروں پر رہ کر کام کیا جا سکے گا‘

اتوار کے روز جرمن اخبار بلڈ ام زونٹاگ سے بات چیت میں انہوں نے کہا کہ وہ اس سلسلے میں مجوزہ قانون سازی پر کام کر رہے ہیں، جس کے تحت کورونا وائرس کی وبا کے خاتمے کے بعد بھی ایسے ملازمین کو گھروں میں رہ کر کام کرنے کا حق حاصل ہو سکے گا، جن کے کام کی نوعیت ایسی ہو جس کے لیے روز دفتر جانا ضروری نہیں۔
انہوں نے بتایا کہ اس کے لیے رواں برس موسم خزاں تک قانونی مسودہ پارلیمان میں پیش کیا جا سکتا ہے۔

ان کا کہنا ہے کہ اس طرح ملک میں گھر سے کام کرنے والے افراد کی تعداد 12 فیصد سے بڑھ کر 25 فیصد ہو جائے گی، جو مجموعی طور پر آٹھ ملین کے قریب بنتی ہے۔
انہوں نے بتایا کہ اس قانون کے تحت ہر وہ شخص جس کی ملازمت اس بات کی اجازت دیتی ہے کہ وہ اپنے گھر ہی سے کام کر سکے، اسے یہ حق دیا جائے گا۔

ہائل نے بتایا کہ کورونا وائرس کی وبا کی وجہ سے وہ یہ اندازہ لگا رہے ہیں کہ ملک میں کتنا کام گھروں پر رہ کر کیا جا سکتا ہے۔ انہوں نے زور دیا کہ حکومت گھر میں رہ کر دفتر کا کام کرنے کے حق میں تو ہے، مگر وہ اسے لازمی نہیں بنائے گی۔ انہوں نے کہا کہ بعض صورتوں میں کسی ملازم کا ہفتے میں ایک یا دو دن دفتر جانا کافی ہو سکتا ہے اور اسے پورا ہفتہ دفتر جانے کی ضرورت نہیں ہوتی۔

ہائل کا تعلق جرمنی کی بائیں بازو کی جماعت سوشل ڈیموکریٹک پارٹی سے ہے۔
جرمنی میں سوشل ڈیموکریٹک پارٹی کورونا وائرس کے پھیلاؤ سے قبل گزشتہ برس دسمبر میں ملازمین کو ہوم آفس سے کام کرنے کے حق میں بات کر چکی ہے، جس کا عملی مظاہرہ کورونا کے بحران کے دوران سامنا آچکا ہے۔

ع ت، ش ج (اے ایف پی، اے پی)