جرمنی میں مرسیڈیز کے پلانٹ پر فائرنگ میں دو افراد ہلاک

جرمن کار ساز ادارے مرسیڈیز کے ایک پلانٹ پر فائرنگ کے نتیجے میں دو افراد ہلاک ہو گئے۔ پولیس نے جمعرات کی صبح اس واقع میں ملوث ایک چون سالہ مشتبہ شخص کو حراست میں لے لیا۔ پولیس کے مطابق ہنگامی کالیں موصول ہونے کے بعد اس نے سنڈیلفنگن میں مرسڈیز پلانٹ پر ایک خصوصی آپریشن کیا۔  دو ہیلی کاپٹروں اور کئی ایمرجنسی ڈاکٹروں نے بھی اس کارروائی میں حصہ لیا ۔ اس دوران متاثرہ مقام کو سیل کر دیا گیا تھا۔

 پولیس کے مطابق فائرنگ کے پس پردہ محرکات  ابھی تک واضح نہیں ہو سکے۔ مبینہ طور پر مقامی وقت کے مطابق صبح سات بج کر پینتالیس منٹ پر متعدد گولیاں چلائی گئیں۔ ہلاک ہونے والے دونوں افراد کی عمر بیالیس سال تھی۔

پولیس نے تقریباً ایک گھنٹے بعد ٹویٹ کیا کہ پولیس اور امدادی کارکنان پر مشتمل ایک آپریشن شٹٹ گارٹ شہر کے جنوب مغرب میں تقریباً 15 کلومیٹر  کے فاصلے پر واقع مرسیڈیز کے پلانٹ پر جاری  ہے۔ حکام نے تصدیق کی کہ ایک مشتبہ شخص کو حراست میں لے لیا گیا ہے۔

جرمن شہر ہیمبرگ میں شوٹنگ، دو افراد ہلاک

استغاثہ نے کہا کہ گرفتار شخص کی عمر ترپن سال ہے اور خیال کیا جاتا ہے کہ اس نے اکیلے ہی یہ حرکت کی تھی۔ اس کے بارے میں یہ بھی کہا جاتا ہے کہ وہ فیکٹری کا ملازم نہیں تھا بلکہ فیکٹری کے ساتھ کام کرنے والی ایک لاجسٹک فرم کا ملازم تھا ۔

 ایمرجنسی سروسز نے عمارت کی تلاشی لی تاکہ  دیگر زخمی افراد کو بھی ڈھونڈا جا سکے۔ ملازمین نے بتایا کہ یہ واقع اس فیکٹری میں پیش آیا، جہاں اس فرم کی فلیگ شپ ایس کلاس گاڑی تیار کی جاتی ہے۔

مرسیڈیز نے تصدیق کی کہ پلانٹ میں ایک واقعہ ہوا تھا اور وہ حکام کے ساتھ رابطے میں ہیں لیکن انہوں  نے اس بارے مزید تفصیل نہیں بتائی۔ کمپنی نے ایک بیان میں کہا، ''ہم حکام کے ساتھ رابطے میں ہیں اور حقائق کو واضح کرنے کی کوشش کر رہے ہیں۔ ملازمین کی حفاظت سب سے پہلے آتی ہے۔‘‘

رچرڈ کونر(ش ر ⁄ ع ت )