ترک وزیر اعظم کا سوشل میڈیا پر ’نیا حملہ‘

رجب طیب ایردوآن نے اتوار کو ایک الیکشن ریلی سے خطاب میں کہا: ’’میری سمجھ میں یہ بات نہیں آتی کہ ہوش مند لوگ فیس، یوٹیوب اور ٹوئٹر کا دفاع کیسے کر سکتے ہیں۔ وہ ہر طرح کے جھوٹ کو پھیلا رہے ہیں۔‘‘

ان کا مزید کہنا تھا: ’’میری یہ ذمہ داری ہے کہ اپنے ملک کی سلامتی کو درپیش خطرے کے خلاف اقدامات کروں، ایسے کرتے ہوئے چاہے مجھے مخالفت کا سامنا ہی کیوں نہ کرنا پڑے۔‘‘

قبل ازیں اتوار کو ہی ترکی کے صدر عبداللہ گُل نے ٹوئٹر پر سے پابندی ہٹائے جانے کی امید ظاہر کی تھی۔ انہوں نے ہالینڈ کے دورے پر روانگی سے قبل صحافیوں سے بات چیت میں کہا: ’’مجھے یقین ہے کہ یہ مسئلہ جلد حل ہو جائے گا۔‘‘

ان کا مزید کہنا تھا: ’’ترکی جیسے ترقی یافتہ ملک کے لیے یہ بلاشبہ ایک ناگوار صورتِ حال ہے، جو ایک ایسا ملک ہے جو خطے میں اہمیت رکھتا ہے اور جو رکنیت کے لیے یورپی یونین سے بات چیت کر رہا ہے۔‘‘

خبر رساں ادارے اے ایف پی کے مطابق عبداللہ گُل اور رجب طیب کی جانب سے متضاد بیانات سے دونوں رہنماؤں کے درمیان بڑھتے ہوئے فاصلوں کی نشاندہی ہوتی ہے۔ ترکی میں علاقائی سطح پر انتخابات ہونے والے ہیں اور ان حالات میں سوشل میڈیا کے خلاف اقدامات بالخصوص توجہ کا مرکز بنے ہوئے ہیں۔

ترکی میں ٹوئٹر پر پابندی گزشتہ جمعرات کو لگائی گئی۔ یہ حکومتی اقدام اس وقت سامنے آیا، جب رجب طیب ایردوآن کی حکومت بدعنوانی کے متعدد اسکینڈلز کی زد میں ہے اور حکومت مخالفین ٹوئٹر پر اس سلسلے میں حکومت پر شدید تنقید کرتے نظر آ رہے تھے۔ ترکی میں اس پابندی کے باوجود متعدد ٹوئٹر صارفین بدستور سماجی رابطے کی اس ویب سائٹ تک رسائی رکھتے ہیں۔

اے ایف پی کے مطابق ناقدین کا کہنا ہے کہ ٹوئٹر پر پابندی کا مقصد حکومت کے خلاف بدعنوانی کے اسکینڈل کو دبانا ہے۔ انقرہ حکومت کے اس اقدام پر انسانی حقوق کے گروپوں اور ترکی کے مغربی اتحادیوں نے تنقید کی ہے۔

گزشتہ ہفتے جرمن چانسلر انگیلا میرکل نے ترک حکومت کی جانب سے ٹوئٹر کی بندش کو تنقید کا نشانہ بنایا تھا۔ اس حوالے سے ان کے ترجمان نے ٹوئٹر ہی کے ذریعے پیغام جاری کیا تھا۔

میرکل کے ترجمان اشٹیفان زائبرٹ کا کہنا تھا کہ ایک آزاد معاشرے میں شہریوں کو اطلاعات تک رسائی کے لیے اپنا من پسند طریقہ اختیار کرنے کا حق ہوتا ہے اور یہ بات طے کرنا ریاست کا کام نہیں ہے۔