بیلجیم میں مراکشی فٹبال ٹیم کے ایک سو سے زائد مداح گرفتار

بیلجیم میں پولیس نے مراکش کی فٹبال ٹیم کے ایک سو سے زائد پرستاروں کو گرفتار کر لیا ہے۔ ان افراد کو فیفا ورلڈ کپ کے بدھ کی رات ہوئے سیمی فائنل میں مراکش کی فرانس کے ہاتھوں شکست کے بعد دارالحکومت برسلز میں ہلڑ بازی کرنے کے الزام میں گرفتار کیا گیا۔

بیلجیم پولیس کے مطابق گرفتارکے گئے افراد پر نقص امن، پولیس کی دو گاڑیوں کو نقصان پہنچانے اور غیر قانونی طور پر آتش بازی کا سامان رکھنے کے الزامات کا سامنا ہے۔ اس کے ساتھ ساتھ اینٹورپ شہر میں بھی پولیس نے متعدد مراکشی فٹبال ٹیم کے پرستاروں کو گرفتار کیا ہے۔ مقامی نیوز ایجنسی بیلگا کے مطابق حکام کو خدشہ تھا کہ اب بھی تعطل کی وہی صورتحال پیدا ہو سکتی ہے جو بیلجیم کی گروپ کے مرحلے پر مراکش کے ہاتھوں شکست کے بعد بیلجیم اور نیدر لینڈز میں ہونے والے مظاہروں سے پیدا ہوئی تھی۔

فرانسیسی مداحوں کا جشن

فرانس بھر میں خوشگوار مناظر کے باوجود پولیس نے مراکش اور اس کے سابق نو آبادیاتی حکمران (فرانس) کے درمیان میچ کے دوران اور اس کے بعد کسی بھی قسم کی بدامنی کو روکنے کے لیے 10,000 کے قریب افسران کو متحرک کیا تھا۔

فرانسیسی پولیس  نے پیرس میں آرک ڈی ٹرومفے کے قریب آتش بازی کرنے والے شائقین کے ایک گروپ کو منتشر کیا اور جنوبی شہر نیس میں پٹاخے چلانے والے فٹ بال کے شائقین کے خلاف آنسو گیس کا استعمال کیا۔

پولیس نے ملک بھر میں 170 کے قریب گرفتاریاں بھی  کیں، جن میں تقریباً 40 افراد کا ایک گروپ بھی شامل ہے، جو انتہائی دائیں بازو کے گروہوں سے منسلک تھے۔ بتایا گیا ہے کہ یہ افراد ممنوعہ ہتھیاروں کے ساتھ پکڑے گئے تھے۔

مونٹ پیلیئر میں سانحہ

فرانس کے جنوبی شہر مونٹ پیلیئر میں مراکش کے شائقین نے اس نقصان کا جواب آتش بازی اور سڑکیں گھیرٗ کر دیا۔ مقامی حکام نے بتایا کہ ایک 14 سالہ لڑکا کارکی ٹکر لگنے سے شدید زخمی ہونے کے کچھ دیر بعد ہسپتال میں دم توڑ گیا۔ سوشل میڈیا پر پوسٹ کی گئی فوٹیج میں حادثے میں ملوث کار ڈرائیور کے اچانک یو ٹرن لینے سے پہلے شائقین کو اس گاڑی سے فرانسیسی جھنڈا کھینچتے ہوئے دیکھا گیا۔

اس حادثےکی پولیس تفتیش جاری ہے۔

ش ر ⁄ ک م ( ڈی پی اے، اے پی، اے ایف پی)