بیروت بم دھماکہ: شدید قومی اور بین الاقوامی رد عمل

اس حملے کا ہدف داخلی سکیورٹی فورس ISF کے انٹیلیجنس چیف 47 سالہ بریگیڈیئر وسام الحسن تھے، جو سابق وزیر اعظم رفیق الحریری کے قتل کی تحقیقات کی قیادت کر رہے تھے۔ یہ تحقیقات اس رُخ پر جا رہی تھیں کہ 2005ء میں رفیق الحریری پر حملے کے پیچھے شام اور لبنان میں اُس کی حلیف تنظیم حزب اللہ کا ہاتھ تھا۔ جمعے کے کار بم دھماکے میں وسام الحسن کے علاوہ سات مزید افراد بھی ہلاک ہو گئے جبکہ تقریباً 80 افراد زخمی ہوئے ہیں۔

لبنانی سیاستدانوں نے الزام عائد کیا ہے کہ اس حملے کے پیچھے صدر بشار الاسد کا ہاتھ ہے۔ اب یہ خدشات مزید تقویت پکڑ گئے ہیں کہ ہمسایہ ملک شام میں جاری خانہ جنگی لبنان کو بھی اپنی لپیٹ میں لے سکتی ہے۔

آج لبنانی وزیر اعظم نجیب میقاتی نے کہا ہے کہ اس بم حملے کا تعلق شام کی خانہ جنگی اور لبنان میں افراتفری پھیلانے کے اُس منصوبے سے ہے، جس کا حال ہی میں بر وقت پتہ چلا لیا گیا تھا۔ اس منصوبے کا پتہ وسام الحسن نے چلایا تھا اور یوں اس سال اگست میں اسد کے ایک حامی سابق لبنانی وزیر کی گرفتاری عمل میں آئی تھی، جسے لبنان میں شام کے اثر و رسوخ کے لیے ایک بڑا دھچکا قرار دیا جا رہا تھا۔

وسام الحسن ایک سنی مسلمان تھے، اس لیے سنی مسلمانوں نے گزشتہ رات اور آج ہفتے کو بھی بیروت کی سڑکوں پر احتجاجی جلوس نکالا، سڑکوں پر رکاوٹیں کھڑی کیں اور ٹائر جلا کر کل کے بم دھماکے پر اپنے غم و غصے کا اظہار کیا۔ اسی طرح کا احتجاج لبنان کے کچھ دیگر شہروں میں بھی کیا گیا۔

وسام الحسن کو اندازہ تھا کہ وہ اس طرح کے حملے کا نشانہ ہو سکتے ہیں، اس لیے اُنہوں نے اپنے اہل خانہ کو پہلے ہی پیرس منتقل کر دیا تھا۔ وہ خود ابھی جمعرات کو جرمنی سے واپس لبنان پہنچے تھے۔ وسام الحسن کو کل اتوار کے روز رفیق الحریری مرحوم کے پہلو میں دفن کیا جائے گا۔

رفیق الحریری مرحوم کے بیٹے سعد الحریری نے بھی اس کار بم دھماکے کا ذمہ دار شامی صدر اسد کو ٹھہرایا ہے۔ لبنانی اپوزیشن ’مارچ چودہ بلاک‘ نے وزیر اعظم نجیب میقاتی کی حکومت سے مستعفی ہو جانے کا مطالبہ کیا ہے۔ میقاتی کی کابینہ میں حزب اللہ سے تعلق رکھنے والے وزراء بھی شامل ہیں۔ میقیاتی نے آج کہا کہ انہوں نے تو مستعفی ہونے کی پیشکش کی ہے لیکن صدر مشیل سلیمان نے انہیں سردست اپنے عہدے پر کام کرتے رہنے کے لیے کہا ہے۔

اُدھر حزب اللہ اور اسد کے ایک بڑے حامی ایران کے وزیر خارجہ علی اکبر صالحی نے کل کے بم دھماکے کی مذمت کرتے ہوئے کہا ہے کہ وہ آج ہفتے کو بیروت پہنچ رہے ہیں۔ ایرانی وزارتِ خارجہ کی وَیب سائٹ پر جاری کیے گئے ایک بیان میں اس حملے کا ذمہ دار اسرائیل کو ٹھہرایا گیا ہے جبکہ ایک سرکردہ اسرائیلی عہدیدار نے اس الزام کو لغو اور بے بنیاد قرار دیا ہے۔ دمشق حکومت نے بھی حملے کے فوراً بعد اسے ایک ’بزدلانہ کارروائی‘ قرار دیتے ہوئے اس کی مذمت کی تھی۔

بیروت کے اس بم دھماکے کے بعد مغربی طاقتوں میں بھی یہ خدشات زور پکڑتے جا رہے ہیں کہ شام میں جاری جنگ کا دائرہ پھیل کر دیگر ممالک کو بھی اپنی لپیٹ میں لے سکتا ہے۔ امریکی وزیر خارجہ ہلیری کلنٹن نے وسام الحسن کی ہلاکت کو اس امر کی ایک خطرناک علامت قرار دیا ہے کہ کچھ عناصر لبنان کو غیر مستحکم کرنے کی کوششیں جاری رکھے ہوئے ہیں۔ فرانسیسی صدر فرانسوا اولانڈ نے لبنانی سیاستدانوں پر زور دیا ہے کہ وہ متحد ہو کر ملک کو غیر مستحکم کرنے کی تمام تر کوششوں کو ناکام بنا دیں۔ ویٹیکن اور یورپی یونین نے کل کے کار بم حملے کی مذمت بھی کی ہے۔

(aa/km(reuters