بھارتی مسلمانوں کے بنگلہ دیش آنے کا خطرہ، ٹیلی کام سروس معطل

بنگلہ دیش میں ٹیلی کام ریگولیٹر انتظامیہ کی جانب سے جاری بیان میں کہا گیا ہے کہ بھارت کے ساتھ سرحد پر  قریب ایک کلو میٹر کے علاقے میں ٹیلی کام سروس بند کر دی  ہے۔ بیان میں کہا گیا ہے، ''موجودہ حالات میں ملک کی سکیورٹی کو مد نظر رکھتے ہوئے یہ فیصلہ کیا گیا ہے۔‘‘

بنگلہ دیشی حکومت کو خدشہ ہے کہ اگر بھارت نے شہریت ترمیمی قانون اور بھارتی ریاست آسام میں این آر سی قانون کے تحت وہاں غیر قانونی طور پر رہائش پذیر بنگلہ دیشی مسلمانوں  اور دیگر غیر قانونی مسلمان رہائشیوں پر بھارت میں رہائش پر پابندی عائد کر دی تو وہ مسلمان بنگلہ دیش میں داخل ہونے کی کوشش کریں گے۔ بنگلہ دیش کی بھارت کے ساتھ چار ہزار کلو میٹر طویل سرحد ہے۔ سروس کی معطلی قریب دس ملین موبائل فون استعمال کرنے والوں کو متاثر کرے گی۔ ایک مقامی ٹیل کام آپریٹر کے ترجمان ایس ایم فرہاد کا کہنا ہے،'' لوگوں کی ایک بہت بڑی تعداد انٹرنیٹ، اور موبائل سروس کی سہولت سے محروم ہو گی۔‘‘

بنگلہ دیش ٹیلی کمیونیکیشن ریگولیٹری کمیشن کا کہنا ہے کہ بھارت میں شہریت ترمیمی قانون کے باعث خدشہ ہے کہ بھارت سے بہت سے لوگ بنگلہ دیش کا رخ کریں گے اور اسی ممکنہ مہاجرت کے پیش نظر ٹیلی کام سروس معطل کی گئی ہے۔ بھارت میں شہریت ترمیمی قانون کے تحت بنگلہ دیش، پاکستان اور افغانستان سے کوئی بھی شخص جو وہاں کی اقلیت سے تعلق رکھتا ہو، بھارت میں پناہ لے سکتا ہے۔ اس قانون کے تحت بھارت میں مسلمانوں کو پناہ نہیں دی جائے گی۔

نیوز ایجنسی اے ایف پی کے مطابق گزشتہ دو ماہ میں کم از کم ساڑھے تین سو افراد کو بھارت اور بنگلہ دیش کی مغربی سرحد پر بھارت سے بنگلہ دیش داخل ہوتے ہوئے پکڑا گیا ہے۔ حکام کے مطابق ان میں سے زیادہ تر وہ بنگلہ دیشی مسلمان ہیں جو غیر قانونی طور پر بھارت میں رہائش پذیر تھے۔ سرحد کی سکیورٹی پر معمور ایک گارڈ کا کہنا ہے کہ بھارت سے بنگلہ دیش آنے والے افراد کی تعداد میں مسلسل اضافہ ہو رہا ہے۔

 بھارت میں شہریت ترمیمی قانون کے علاوہ بھارتی ریاست آسام میں این آر سی نامی قانون کے نفاذ سے بھی بنگلہ دیش میں مہاجرت کا سلسلہ بڑھ گیا ہے۔ اس قانون کے تحت ایسے قریب پانچ لاکھ مسلمانوں کی نشاندہی کی گئی ہے جن کے پاس بھارت کی شہریت نہیں ہے۔ خطرہ ہے کہ بھارت ان مسلمانو‌ں کو ملک چھوڑنے کا کہے گا۔

بھارت میں شہریت ترمیمی قانون اور ملک بھر میں این آر سی قانون کے ممکنہ نفاذ کے خلاف ملک گیر احتجاجی مظاہروں کا سلسلہ جاری ہے۔ اب تک مظاہرین اور پولیس میں تصادم کے باعث ستائیس افراد ہلاک ہو گئے ہیں۔

ب ج / ک م (اے ایف پی، روئٹرز)