بھارت: 'مگجوم' طوفان کا خطرہ، 3 ریاستوں میں ہائی الرٹ جاری
4 دسمبر 2023
بھارتمیں 'مگجوم' نامی سمندری طوفان کے خطرے کے پیش نظر ملک کی جنوبی اور مشرقی ساحلی پٹی کے قریب واقع تامل ناڈو، آندھرا پردیش اور اوڈیشا کی ریاستوں کے لیے ہائی الرٹ جاری کر دیا گیا ہے۔
محکمہ موسمیات کے مطابق مگجوم کل منگل کے روز بھارت کے جنوبی ساحل سے ٹکرا سکتا ہے اور اس دوران 110 کلومیٹر فی گھنٹہ کی رفتار تک ہوائیں چل سکتی ہیں۔
محکمہ موسمیات کے سربراہ مرتیونجے موہاپاترا کا کہنا ہے کہ طوفان کی موجودہ سمت اور رفتار کے مطابق یہ منگل کو دوپہر کے وقت آندھرا پردیش کے علاقے باپٹلا کے قریب ساحل سے ٹکرا سکتا ہے۔
محکمہ موسمیات نے تامل ناڈو، آندھرا پردیش اور اوڈیشا کی ریاستوں میں سیلاب کی بھی پیش گوئی کی ہے۔
طوفان سے پہلے کا حال
اس طوفان کی متوقہ آمد سے قبل پیر کو خلیج بنگال کے اوپر اس طوفان کا باعث بننے والا موسمیاتی نظام مزید شدت اختیار کر کہ 'ڈیپ ڈپریشن' سے سمندری طوفان میں تبدیل ہوگیا۔ اس کے زیر اثر آج بھارت کی جنوبی اور مشرقی ساحلی پٹی پر تند و تیز ہوائیں چلیں اور موسلا دھار بارش ہوئی۔
اس صورتحال کے پیش نظر آندھرا پردیش میں آج اسکول بند رہے۔
بھارتی اخبار 'دی ہندؤ' کے مطابق آندھرا پر دیش کے نشیبی اور ساحلی علاقوں تقریبا 2,000 افراد کو محفوظ مقامات پر منتقل کیا گیا اور مزید 7,000 کی منتقلی کے احکامات جاری کیے گئے ہیں۔
کچھ اسی طرح کی صورتحال تامل ناڈو میں بھی دیکھی گئی جہاں ان چار اضلاع میں عام تعطیل کا اعلان کر دیا گیا جو متوقع طور پر شدید بارش سے متاثر ہو سکتے ہیں۔
تامل ںاڈو کے دارالحکومت چنئی میں شدید بارش کے باعث کئی علاقوں اور سڑکوں پر پانی کھڑا ہو گیا اور شہریوں کو ٹرینوں اور ہوائی جہازوں کے سفر میں بھی رکاوٹوں کا سامنا رہا۔
چنئی کی ایک ویڈیو میں پانی کو ہوائی اڈے کے ٹارمیک پر بہتے ہوئے بھی دیکھا جا سکتا ہے۔
مقامی رپوٹس کے مطابق بھارت کی نیشنل ڈیزاسٹر ریسپانس فورس کے ارکان اس شہر کے نشیبی علاقوں سے لوگوں کو نکال کر محفوظ مقامات پر منتقل کر رہے ہیں۔
اس سے قبل تامل ناڈو کی حکومت نے ایک بیان میں کہا تھا کے طوفان کے خطرے کے پیش نظر وہاں 5,000 ریلیف کمپ قائم کر دیے گئے ہیں۔
اس حوالے سے تامل ناڈو کے وزیر اعلیٰ ایم کے اسٹالن نے بھی ایک بیان میں کہا ہے کہ ان کی ریاست طوفان کا سامنا کرنے کے لیے تیار ہے اور جن علاقوں کا اس سے متاثر ہونے کا خطرہ ہے وہاں متعلقہ حکام کی تعیناتی کر دی گئی ہے۔ انہوں نے طوفان کے تھم جانے تک عوام کو گھروں کے اندر رہنے کی بھی تلقین کی۔
مشرقی ریاست اوڈیشا کے بھی متعدد اضلاع میں تیز بارشیں ہوئی ہین اور متعلقہ حکام کا کہنا ہے کہ ان میں منگل کے روز مزید شدت آ سکتی ہے۔
م ا/ رب (اے پی)