بھارت، فوجی بھرتی کے نئے نظام کے خلاف پرتشدد مظاہرے

بھارت میں فوجی بھرتی کے نئے نظام کے خلاف جاری مظاہروں کے دوسرے روز مظاہرین نے پولیس پر پتھراؤ کیا اور ریل کی بوگیوں کو نذر آتش کر دیا۔ بھارتی وزیر اعظم نریندر مودی کی حکومت نے رواں ہفتے تیرہ لاکھ سے زائد اہلکاروں پر مشتمل بھارتی مسلح افواج میں بھرتی کے نظام میں تبدیلی کا اعلان کیا تھا۔ اس اعلان کا مقصد چار سال کے قلیل معاہدے پر مزید لوگوں کو بھرتی کرنا ہے تاکہ فوجیوں کی ریٹائرمنٹ کی اوسط عمر میں کمی لائی جاسکے۔

لیکن مسلح افواج میں بھرتی کے بہت سے خواہشمندوں کا  مؤقف ہے کہ انہیںچار سال سے زیادہ عرصے تک خدمات انجام دینے کی اجازت ہونی چاہئیے۔ اپوزیشن جماعتیں اور مودی کی حکمران جماعت بھارتیہ جنتا پارٹی کے کچھ ارکان کا کہنا ہے کہ فوجی بھرتی کے اس نئے طریقہ کار سے ملک میں مزید بے روزگاری پیدا ہوگی۔

 شمالی ریاست ہریانہ میں پولیس نے جمعرات کے روز پتھراؤ کرنیوالے مظاہرین کو منتشر کرنے کے لیے ہوائی فائرنگ کی۔ تاہم یہ مظاہرین جمعے کے روز ایک بار پھر جمع ہوئے اور انہوں نے ریل کی بوگیوں کو آگ لگا دی۔ بھارت کی مشرقی ریاست بیہار  میں پولیس کے مطابق مظاہرین کی وجہ سےکم از کم دو اسٹیشنوں پر ریل خدمات میں خلل پڑا ہے۔

بیہار پولیس کے ایک سینیئر افسر سنجے سنگھ کے مطابق، '' مظاہرین نے آج 10 مقامات پر ریلوں کی آمد ورفت روک دی۔‘‘ اس پولیس افسر کا کہنا ہے کہ ریاست میں مظاہروں کے دوران  100 سے زائد افراد کو گرفتار کر لیا گیا ہے۔

جنوبی بھارت کے  شہر سکندرآباد میں بھی سینکڑوں افراد پولیس پر پتھراؤ کرنے کے لیے جمع ہوئے۔ ان کے اس  عمل کو مظاہروں کے ملک بھر میں پھیلنے کی علامت کے طور پر  دیکھا جارہا ہے۔ سکندر آباد کے ایک پولیس افسر آے آر شری نواس کے مطابق، '' مظاہرین نے سکندر آباد کے ریلوے اسٹیشن کی املاک کو بھی نذر آتش کر دیا۔‘‘

اگنی پتھ یعنی 'آگ کی راہ‘ نامی فوجی بھرتی کے اس عمل کے تحت  17 سے 21 سال کے نوجوان لڑکے اور لڑکیوں کو چار سالہ معاہدے کے تحت چھوٹے درجوں کی ملازمتیں مہیا کی جائے گی۔ بعد ازاں ان میں سے ایک چوتھائی کو لمبے دورانیے کے لیے ملازمت پر رکھا جائے گا۔  یہ عمل فوجی افسران کی بھرتی پر لاگو نہیں ہو گا۔

فوجی بھرتی کے پہلے نظام کے تحت بھارتی برّی، بحری اور فضائی افواج  چھوٹے رینکس پر الگ الگ بھرتیاں کرتے تھے۔ یہ اہلکار سترہ سال کے عرصے تک ملازمت کرنے کے اہل تھے۔ حکومت نے جمعے کے روز اس نئی بھرتی کے لیے عمر کی  زیادہ سے زیادہ حد 23 سال کرنے کا اعلان کیا ہے ۔ عمر کی حد میں اس رعایت کی وجہ گزشتہ دو سالوں سے کوویڈ-انیس کی عالمی وبا کی وجہ سے بھرتیوں پر پابندی ہے ۔

 وزارت دفاع کے ایک بیان کے مطابق، '' حکومت نے فیصلہ کیا ہے کہ سن 2022 میں بھرتیوں کے مجوزہ عمل کے لیے عمرکی حد میں ایک بار کی رعایت دی جانی چاہیئے۔‘‘

بھارتی مسلح افواج اس نئے عمل کے تحت رواں سال چھیالیس ہزار بھرتیاں کرنے کا ارادہ رکھتی ہیں۔

ش ر ⁄ک م (رائٹرز)