بھارت خصوصی تجارتی مراعات کا حقدار نہیں، امریکی وزیر تجارت

نئی دہلی سے جمعرات تین اکتوبر کو ملنے والی نیوز ایجنسی روئٹرز کی رپورٹوں کے مطابق امریکی وزیر تجارت نے اس خبر رساں ادارے کے ساتھ اپنے ایک انٹرویو میں کہا کہ امریکا نے بھارت کو دی گئی خصوصی تجارتی حیثیت اسی سال ختم کر دی تھی۔ اس لیے کہ واشنگٹن کی رائے میں نئی دہلی اس خصوصی تجارتی حیثیت کا حقدار ملک نہیں رہا تھا۔

ساتھ ہی ولبر روس نے اس انٹرویو میں کہا کہ امریکا بھارت کے ساتھ تجارتی شعبے میں کسی نئے معاہدے کی شرائط کے لیے مذاکرات جاری رکھے ہوئے ہے۔

اس حوالے سے اہم بات یہ ہے کہ واشنگٹن نے اسی سال بھارت کو حاصل جو خصوصی تجارتی حیثیت ختم کر دی تھی، اس کی وجہ یہ بنی تھی کہ بھارتی حکومت امریکی مصنوعات کو بھارتی منڈی میں اتنی وسیع رسائی نہیں دے رہی تھی، جتنی امریکا نے بھارتی مصنوعات کو اپنی داخلی منڈی میں دے رکھی تھی۔

نئی دہلی کو یہ حیثیت امریکا کے ترجیحات کے عمومی نظام یا جی ایس پی (Generalized System of Preferences) کے تحت حاصل تھی اور اس طرح بھارت امریکا کو سالانہ اپنی 5.6 بلین ڈالر مالیت تک کی تجارتی مصنوعات کسی بھی طرح کے درآمدی محصولات کے بغیر برآمد کر سکتا تھا۔ ان مراعات کے خاتمے کے بعد بھارت نے جواباﹰ اپنے ہاں درآمد کی جانے والی 28 امریکی مصنوعات، جیسے کہ بادام، سیب اور اخروٹ، پر اضافی محصولات عائد کر دیے تھے۔

امریکا کو بھارت سے یہ شکایت بھی ہے کہ بھارت اپنی مصنوعات کی کسی بھی طرح کی امپورٹ ڈیوٹی کے بغیر امریکا برآمد کا خواہش مند تو ہے لیکن ساتھ ہی اس نے ابھی تک اپنی ملکی منڈی کو امریکی مصنوعات کے لیے کافی حد تک نہیں کھولا اور تاحال تجارتی حفاظت پسندی سے کام لے رہا ہے۔

اس بارے میں امریکی وزیر تجارت ولبر روس نے روئٹرز کو بتایا، ''اگر ہم جی ایس پی سے متعلق امریکی بھارتی اختلافات ختم کرنے میں کامیاب ہو گئے، تو یہ آگے کی طرف بہت بڑا قدم ہو گا۔‘‘ انہوں نے کہا، ''ہم امید کرتے ہیں کہ دو طرفہ اختلافات کی یہ خلیج پر کی جا سکے گی اور ہم بھارت کے ساتھ ایک زیادہ بہتر تجارتی معاہدہ طے کرنے کے قابل ہو جائیں گے۔‘‘

ولبر روس کی ان کے بھارتی ہم منصب وزیر پیئوش گویال کے ساتھ آج جمعرات ہی کے روز ایک ملاقات بھی متوقع ہے۔ امریکا اور بھارت کے مابین یہ تجارتی تنازعات گزشتہ کئی مہینوں سے پائے جاتے ہیں اور واشنگٹن کو بڑی بڑی امریکی کمپنیوں کی بھارت میں کاروباری سرگرمیوں سے متعلق نئی دہلی حکومت کی طرف سے عائد کردہ براہ راست یا بالواسطہ پابندیوں پر شدید قسم کے تحفظات بھی ہیں۔

م م / ع ا (روئٹرز)