بنگلہ دیش: پرتشدد جھڑپوں کے بعد حالات معمول پر لانے کی کوشش

آج بروز بدھ کو بھی بنگلہ دیش کے بیشتر حصوں میں انٹرنیٹ کی سہولت موجود نہیں تھی لیکن حکام کی جانب سے سات گھنٹے کے لیے کرفیو میں نرمی کے بعد دارالحکومت کی سڑکوں پر ہزاروں کاریں موجود تھیں۔

بدھ کو دفاتر اور بینک چند گھنٹوں کے لیے کھلے رہے، جب کہ حکام نے ڈھاکہ اور ملک کے دوسرے بڑے شہر چٹاگانگ کے کچھ علاقوں میں براڈ بینڈ انٹرنیٹ بحال کر دیا ہے۔ حکام نے کہا کہ حالات بہتر ہونے تک ڈھاکہ اور دیگر مقامات پر کرفیو جاری رہے گا۔

بنگالی زبان کے معروف روزنامہ ''پروتھم آلو‘‘ نے بدھ کو ایک رپورٹ شائع کی ہے، جس کے مطابق 16 جولائی سے لے کر اب تک ہونے والی پرتشدد جھڑپوں میں کم از کم 197 افراد ہلاک ہو چکے ہیں۔ تاہم سرکاری ذرائع سے ان اعداد و شمار کی تصدیق نہیں ہو سکی ہے۔ اطلاعات ہیں کہ اسکول اور دیگر تعلیمی ادارے اگلے نوٹس تک بند ہی رہیں گے۔

15 جولائی کو پولیس اور خاص طور پر طلبہ مظاہرین کے درمیان جھڑپوں کا آغاز اس وقت ہوا تھا، جب وہ ملازمتوں میں 30 فیصد کوٹہ سسٹم کے خلاف احتجاج کر رہے تھے۔ کوٹہ سسٹم کے تحت اچھی تنخواہ والی سول سروسز، جن میں لاکھوں سرکاری ملازمتیں بھی شامل ہیں، کے عہدوں کو مخصوص گروپوں کے لیے محفوظ کر دیا گیا تھا۔ ان گروپوں میں سن 1971 میں پاکستان سے آزادی کے لیے جنگ میں حصہ لینے والے افراد کے بچے بھی شامل ہیں۔

شدید احتجاج اور جھڑپوں کے بعد گزشتہ اتوار کو سپریم کورٹ نے سن 1971 کے جنگی سابق فوجیوں کا کوٹہ کم کرتے ہوئے پانچ فیصد کر دیا ہے۔ سپریم کورٹ کے نئے حکم نامے کے مطابق اب سول سروس کی 93 فیصد نوکریاں میرٹ کی بنیاد پر ہوں گی جبکہ باقی دو فیصد نسلی اقلیتوں کے ساتھ ساتھ خواجہ سراؤں اور معذور افراد کے لیے مخصوص ہوں گی۔

مظاہرین نے اتوار کے فیصلے پر ردعمل دینے کے لیے کچھ وقت لیا لیکنمنگل کو ان کا کہنا تھا کہ سپریم کورٹ کا فیصلہ اور اس کے بعد کا حکومتی سرکلر مظاہرین کے حق میں ہیں لیکن حکومت کو احتجاج کے دوران خونریزی اور ہلاکتوں کا جواب دینا چاہیے۔

دوسری جانب ملکی وزیر قانون انیس الحق بارہا الزام عائد کرتے ہوئے کہہ چکے ہیں کہ تشدد اپوزیشن بنگلہ دیش نیشنلسٹ کے مسلح مظاہرین کی وجہ سے سنگین ہوا۔ وزیر قانون کے مطابق پارٹی اور دائیں بازو کی جماعت اسلامی نے احتجاجی مظاہروں میں شمولیت اختیار کرتے ہوئے کئی سرکاری تنصیبات پر حملہ کیا۔

ان کا کہنا تھا کہ اس احتجاج کے دوران بنگلہ دیش کے سرکاری ٹیلی ویژن، ایک فلائی اوور کے دو ٹول پلازوں، ایک ایکسپریس وے، ڈھاکہ میں میٹرو ریل کے دو اسٹیشنوں اور سینکڑوں سرکاری گاڑیوں کو بھی نذر آتش کیا گیا۔

بنگلہ دیش پولیس کی جانب سے مرکزی اپوزیشن جماعت کے ہیڈ کوارٹر پر چھاپہ مارتے ہوئے اسے سیل کر دیا گیا ہے۔

ا ا / ع ت (اے پی، اے ایف پی)