ایم کیو ایم کا لندن دفتر سے لاتعلقی کا اعلان

کراچی میں ایک پریس کانفرنس سے خطاب کرتے ہوئے متحدہ قومی موومنٹ کی رابطہ کمیٹی کے سینیئر ڈپٹی کنوینر فاروق ستار نے کہا کہ وہ گزشتہ روز ہونے والے تشدد اور حملے سے لاتعلقی کا اعلان کرتے ہیں ساتھ ہی انہوں نے یہ بھی کہا کہ ایم کیو ایم کے پلیٹ فارم سے ایسا عمل دہرانے کی اجازت نہیں دی جائے گی۔ ان کا کہنا تھا،’’ بڑے وثوق سے کہتا ہوں کہ جو میں کہہ رہا ہوں وہ ایم کیوایم کی پالیسی ہے۔‘‘ میڈیا کے نمائندوں کے سامنے فاروق ستار نے کہا،’’ہمیں قانون ہاتھ میں نہیں لینا اور امن برقرار رکھنا ہے۔‘‘

فاروق ستارکا گزشتہ روزایم کیو ایم کے قائد کی طرف سے پاکستان مخالف نعرے بلند کرنے کے حوالے سے کہنا تھا،’’ کچھ چیزیں قابل دفاع نہیں ہوتیں، ہماری وابستگی صرف پاکستان سے ہے۔‘‘ پاکستانی میڈیا نے بھی رپورٹ کیا کہ اب فاروق ستار نے ایم کیو ایم کی قیادت سنبھال لی ہے۔ فاروق ستار نے کہا کہ جب تک یہ بحران جاری ہے ہم تمام فیصلے پاکستان سے کریں گے۔ پریس کانفرنس میں ڈاکٹر فاروق ستار کے ساتھ ڈاکٹرعامر لیاقت، نسرین جلیل، اور خواجہ اظہار الحسن بھی موجود تھے۔

سوشل میڈیا پر الطاف حسین کی اس تقریر کے وہ حصے شیئر کیے جا رہے ہیں، جس میں وہ پاکستان کے خلاف خود بھی نعرے لگا رہے ہیں اور اپنے کارکنوں سے لگوا بھی رہے ہیں اور پاکستان کو دنیا کے لیے ایک کینسر قرار دے رہے ہیں۔

الطاف حسین نے منگل کو اپنی اس تقریر اور ’پاکستان مخالف‘ نعروں پر معافی مانگتے ہوئے ایک تحریری بیان میں کہا،’’اپنے ساتھیوں کے ماورائے عدالت قتل، ان کی مسلسل گرفتاریوں اور ان کی مشکلات کو دیکھ کر میں شدید ذہنی دباؤ کا شکار ہوا، بھوک ہڑتال پر بیٹھے ساتھیوں کی بگڑتی صورتحال کو دیکھ کر میں نے ان ساتھیوں سے خطاب کرتے ہوئے پاکستان کے خلاف الفاظ استعمال کیے۔‘‘

الطاف حسین کے معافی نامے سے متعلق فاروق ستار نے کہا،‘‘ اگر ایسے بیانات کسی ذہنی دباؤ کا نتیجہ ہیں جو پہلے اس مسئلے کا حل نکلنا چاہیے۔ یہ بہتر ہوگا کہ جب تک الطاف حسین کی صحت سے متعلق معاملات حل نہیں ہوتے تب تک ایم کیو ایم پاکستان سے کام کرے۔‘‘

واضح رہے کہ گزشتہ روز ’ایم کیو ایم‘ کے مظاہرین نے کراچی میں نیوز چینل اے آر وائی کے دفتر پر حملہ کر دیا تھا۔ اے آر وائی نیوز نے اپنی ٹرانسمیشن کے دوران اپنے دفتر پر ہونے والے حملے کی فوٹیج میں دکھایا کہ حملہ آور دفتر میں توڑ پھوڑ کر رہے ہیں۔ گزشتہ روز کی اس اشتعال انگیزی میں اے آر وائی کے دفتر اور قریبی دکانوں میں توڑ پھوڑ کے واقعات اور فائرنگ کے نتیجے میں ایک شخص ہلاک ہوا تھا۔