ایل پیسو فائرنگ ’داخلی دہشت گردی‘ کا معاملہ ہے، امریکی حکام

امریکی حکام کا کہنا ہے کہ ڈیلاس شہر سے تعلق رکھنے والے مشتبہ حملہ آور کا کئی سو کلومیٹر دور جا کر میکسیکو کی سرحد کے قریب وال مارٹ اسٹور میں داخل ہو کر اندھا دھند فائرنگ کر کے 20 افراد کو ہلاک کرنا 'داخلی دہشت گردی‘ کے واقعے کے طور پر دیکھا جا رہا ہے۔

امریکی ریاست ٹیکساس میں فائرنگ: بیس ہلاکتیں، ملزم گرفتار

امریکا میں شوٹنگ کا ایک اور خونریز واقعہ، مزید نو ہلاکتیں

ٹیکساس کے گورنر گریگ ایبٹ نے ہفتے کے روز اس فائرنگ کے واقعے کے بعد کہا تھا کہ یہ بہ ظاہر نفرت انگیزی کا واقعہ تھا۔ پولیس کا کہنا ہے کہ خونریزی کے اس واقعے کا محرک ممکنہ طور پر نسل پرستی ہو سکتا ہے۔

اتوار کے روز امریکا کے وفاقی تفتیشی ادارے ایف بی آئی کی جانب سے جاری کردہ ایک بیان میں کہا گیا ہے کہ یہ واقعہ ''ملک میں نفرت انگیزی کی بنیادوں پر شدت پسندوں کے پرتشدد حملوں کے خطرات کو واضح کرتا ہے۔‘‘

بیان میں اس خدشے کا اظہار بھی کیا گیا ہے کہ امریکا میں موجود شدت پسند اس طرز کے بڑے واقعات سے متاثر ہو کر ایسے ہیں حملوں اور پرتشدد واقعات میں ملوث ہو سکتے ہیں۔

''ایف بی آئی امریکی عوام سے درخواست کرتی ہے کہ وہ کسی بھی مشتبہ سرگرمی، جسے وہ ذاتی طور پر مشاہدہ کریں یا یا آن لائن، اس کی خبر قانون نافذ کرنے والے اداروں کو دیں۔‘‘

ریاستی دفتر استغاثہ کا کہنا ہے کہ وہ اس واقعے میں ملوث حملہ آور مشتبہ ملزم 21 سالہ پیٹرک کروسِس کے لیے موت کی سزا کی درخواست کریں گے۔

ع ت، ع ح (روئٹرز، اے ایف پی، اے پی)