ایردوآن کے لیے لمحہ فکریہ؟

اتوار 31 مارچ کو ہوئے علاقائی انتخابات میں حکمران جماعت اور حزب اختلاف دونوں دعویٰ کر رہی ہیں کہ یورپ اور ایشیا کے سنگم پر واقع شہر استنبول میں انہیں کامیابی حاصل ہوئی ہے۔ تاہم ابھی تک ووٹوں کی گنتی مکمل نہیں ہو سکی ہے۔

سرکاری ذرائع نے بتایا ہے کہ ملک بھر سے حاصل ہونے والے ابتدائی نتائج کے  مطابق (اے کے پی) کو 48 فیصد ووٹ ملے ہیں جبکہ حزب اختلاف کی ریپبلکن پیپلز پارٹی (سی ایچ پی) کو ملنے والے ووٹوں کی تعداد 31 فیصد ہے۔ انقرہ میں حزب اختلاف کے امیدوارکی کامیابی پر حکمران جماعت کی جانب سے ابھی تک کوئی رد عمل سامنے نہیں آیا ہے۔

ترک صدر رجب طیب ایردوآن کی جسٹس اینڈ ڈیویلمپمنٹ پارٹی( اے کے پی) نے دعویٰ کیا ہے کہ علاقائی انتخابات میں انہیں کامیابی حاصل ہوئی ہے اور تقریباً سولہ بڑے شہروں میں میئر کی ذمہ داریاں ان کے امیدوار نبھائیں گے۔ 2014ء میں ہوئے گزشتہ انتخابات میں اٹھارہ شہروں میں ’اے کے پی‘ کے میئر منتخب ہوئے تھے۔

استنبول میں ’اے کے پی‘ کے امیدوار بن علی یلدرم نے اعلان کیا ہے کہ انہیں چار ہزار ووٹوں کی برتری کا سامنا ہے۔ دوسری جانب سی ایچ پی کے رہنما اکرام اماموگلو نے بھی استنبول میں کامیابی کا دعویٰ کیا ہے۔

امامو گلو نے ووٹوں کی گنتی مکمل ہونے سے قبل صحافیوں سے باتیں کرتے ہوئے اے کے پی پر انتخابی عمل میں دھاندلی کا الزام عائد کیا تھا تاہم بعد ازاں اتوار کی شب انہوں  نے کہا کہ نتائج کو دیکھتے ہوئے وہ یہ کہہ سکتے ہیں کہ استنبول میں سی ایچ پی کو ہی برتری حاصل ہے۔

ترکی میں ہونے والے علاقائی انتخابات کو صدر رجب طیب ایردوآن اور ان کی حکومت کی مقبولیت کا ایک امتحان بھی قرار دیا جا رہا تھا۔ ترکی آج کل شدید اقتصادی مسائل کا شکار ہے اور اس کی کرنسی لیرا کی قدر مییں شدید کمی آ چکی ہے۔