ایران جوہری معاہدہ، عالمی رہنماؤں کا خیرمقدم، اسرائیل کی تنقید

عالمی رہنماؤں اور زیادہ تر ممالک کی جانب سے اس معاہدے کو دنیا کو محفوظ بنانے کی جانب ایک قدم قرار دیتے ہوئے اس کا خیر مقدم کیا گیا ہے تاہم اسرائیل کی طرف سے اس پر تنقید بھی سامنے آئی ہے۔ اسرائیلی رہنماؤں کے مطابق اس معاہدے میں اس بات کی گارنٹی نہیں لی گئی کہ ایران مستقبل میں ایٹمی ہتھیار نہیں بنائے گا۔ جنیوا میں ہفتہ اور اتوار 24 نومبر کی شب طے پانے والے اس معاہدے کے بارے میں عالمی رہنماؤں کی جانب سے سامنے آنے والے ردعمل کی مختصر تفصیل کچھ یوں ہے،

امریکی صدر باراک اوباما

’’آج امریکا نے اپنے قریبی اتحادیوں اور پارٹنرز کے ساتھ مل کر، ان تحفظات کے جامع حل کی جانب ایک اہم پہلا قدم بڑھایا ہے جو اسلامک ری پبلک ایران کے جوہری پروگرام سے متعلق ہیں۔‘‘

امریکی وزیر خارجہ جان کیری

’’یہ پہلا قدم، میں اس بات پر زور دینا چاہتا ہوں کہ یہ دراصل اس پروگرام کو جہاں یہ آج ہے وہاں سے رول بیک کرتا ہے، اس پر عملدرآمد کے وقت کو بڑھاتا ہے، جو اس معاہدے کے بغیر ممکن نہ ہوتا۔ یہ خطے میں ہمارے پارٹنرز کو محفوظ بنائے گا۔ یہ اسرائیل کو محفوظ بنائے گا۔‘‘

اسرائیلی وزیر اعظم بینجمن نیتن یاہو

’’جو کچھ گزشتہ شب جنیوا میں حاصل کیا گیا وہ تاریخی معاہدہ نہیں ہے، یہ ایک تاریخی غلطی تھی۔ آج دنیا کہیں زیادہ خطرناک جگہ بن گئی ہے کیونکہ دنیا کی خطرناک ترین حکومت نے دنیا کے خطرناک ترین ہتھیار کے حصول کی جانب ایک اہم قدم بڑھایا ہے۔‘‘

اسرائیلی وزیر خارجہ اویگدور لیبرمن

’’یہ معاہدہ ایران کی عظیم ترین سفارتی فتح ہے، جس نے یورینیئم کو افزودہ کرنے کے حق کو قانونی طور پر تسلیم کرا لیا ہے۔‘‘

ایرانی صدر حسن روحانی

’’یہ معاہدہ تمام علاقائی ممالک اور عالمی امن کے لیے فائدہ مند ہے۔ مذاکراتی ٹیموں کی تعمیری بات چیت اور انتھنک کوششوں نے نئے افق وا کیے ہیں۔‘‘

روسی وزیر خارجہ سیرگئی لاوروف

’’کسی کو بھی نقصان نہیں ہوا، ہر ایک کی فتح ہوئی ہے۔ ہم اس بات کے قائل ہیں کہ ایران (بین الاقوامی ایٹمی توانائی) ایجنسی کے ساتھ نیک نیتی کے ساتھ تعاون کرے گا۔‘‘

چینی وزیر خارجہ وانگ ژی

’’یہ معاہدہ بین الاقوامی جوہری عدم پھیلاؤ کے نظام کی بحالی میں معاون ہوگا، اور مشرق وُسطیٰ میں امن اور استحکام کا ضامن ہوگا۔‘‘

برطانوی وزیر خارجہ ولیم ہیگ

’’یہ معاہدہ پوری دنیا کے لیے اچھا ہے، بشمول مشرق وسطیٰ کے ممالک اور ایران کے اپنے عوام کے۔‘‘

فرانسیسی وزیر خارجہ لاراں فابیوس

یہ سمجھوتہ ’’ایران کے سویلین جوہری توانائی کے حق کی تصدیق کرتا ہے مگر اس کے ایٹمی ہتھیار تک رسائی کی نفی کرتا ہے۔‘‘