اڑسٹھ ویں کن فلمی میلے میں جگمگاتے فلمی ستارے
فرانس میں کن (Cannes) کے مقام پر اڑسٹھ ویں بین الاقوامی فلمی میلے کا آغاز ہو گیا ہے۔ یہ بارہ روزہ میلہ چوبیس مئی تک جاری رہے گا۔
بالی وُڈ کے ستارے بھی
اس میلے کا افتتاح ’اسٹینڈنگ ٹال‘ نامی فرانسیسی فلم کی نمائش سے ہوا، جو مقابلے کے شعبے میں شامل نہیں ہے۔ اس فلم شو کو دیکھنے کے لیے وہاں موجود دیگر فلمی ستاروں میں بھارتی فلمی دنیا کی مشہور اداکارہ کترینا کیف بھی شامل تھیں۔
’بارہ سال‘ کی غلام خاتون ریڈ کارپٹ پر
افتتاحی تقریب اور فلم شو میں شرکت کے لیے کینیا کی اداکارہ لیوپیٹا نیونگو بھی پہنچیں۔ اُنہیں فلم 12 Years میں ایک غلام خاتون کے کردار پر 2014ء میں بہترین معاون اداکارہ کے آسکر ایوارڈ سے نوازا گیا تھا۔
دنیا بھر کے فوٹوگرافرز ایک ساتھ
تیرہ مئی بدھ کی شام فرانس میں کن کے مقام پر سالانہ فلمی میلے میں ریڈ کارپٹ پر جلوہ گر ہونے والی فلمی شخصیات کی تصاویر بنانے کے لیے دنیا بھر سے گئے ہوئے فوٹوگرافرز بہترین سے بہترین تصویر حاصل کرنے کی کوشش میں نظر آ رہے ہیں۔
فوٹوگرافرز کے لیے پوز
فرانسیسی اداکارہ لیلیٰ بختی کن فلمی میلے کی افتتاحی تقریب میں شرکت کے لیے جاتے ہوئے فوٹوگرافرز کے لیے پوز بنا رہی ہیں۔ اس بار اس بارہ روزہ میلے میں گولڈن پام کے اعلیٰ اعزاز کے لیے مقابلے کے شعبے میں اُنیس فلمیں شامل ہیں۔
افتتاحی تقریب کے نامور شرکاء
فلمی دنیا کی نامور شخصیات تیرہ مئی کی شام کو منعقدہ تقریب میں شریک ہوئیں۔ اس تصویر میں جیوری کے ارکان دیکھے جا سکتے ہیں۔ (بائیں سے دائیں) آسکر ایوارڈ یافتہ امریکی فلمساز و ہدایتکار برداران جوئل اور ایتھن کوئن اس بار جیوری کی صدارت کے فرائض انجام دے رہے ہیں جبکہ اُن کے ساتھ فرانسیسی اداکارہ صوفی مارسو اور دیگر فلمی شخصیات براجمان ہیں۔
دو بھائی جیوری کے سربراہ
جوئل کوئن (بائیں) اور ایتھن کوئن کن میلے کی افتتاحی تقریب میں فوٹوگرافرز کے لیے پوز دے رہے ہیں۔ یہ دونوں بھائی اس بار اُس نو رُکنی جیوری کی قیادت کر رہے ہیں، جو بہترین فلم، بہترین ہدایتکار اور دیگر شعبوں میں عمدہ کارکردگی کے لیے گولڈن پام کے اعزازات کا فیصلہ کرے گی۔
فیچر فلم جیوری کے ارکان
(بائیں سے دائیں) فرانکو کینیڈین ہدایتکار اور اداکار ساویئر ڈولن، ہسپانوی اداکارہ روسی ڈے پالما، میکسیکو کے فلم ڈائریکٹر گلیرمو ڈیل ٹورو، امریکی ڈائریکٹر جوئل کوئن اور فرانسیسی اداکارہ صوفی مارسو کن میلے کی افتتاحی تقریب میں شریک ہیں۔
فرانسیسی اداکارہ مرکزِ نگاہ
کن میلے کی افتتاحی تقریب میں اکہتر سالہ فرانسیسی اداکارہ کیتھرین ڈینیف فوٹوگرافرز کی توجہ کا خاص مرکز بنی رہیں۔ اس بار اس میلے کو مجموعی طور پر 1854 فلمیں موصول ہوئی تھیں، جن میں سے منتخب فلمیں ہی اس میلے میں نمائش کے لیے پیش کی جا رہی ہیں۔
کیمرہ مین بھی مستعد
کن میلے کی افتتاحی تقریب کا ایک پہلو یہ بھی ہے۔ جب چوٹی کی فلمی شخصیات ریڈ کارپٹ پر قدم رکھتی ہیں تو دنیا بھر سے گئے ہوئے چِیدہ چِیدہ کیمرہ مین اور فوٹوگرافر بھی ان تاریخی لمحات کو محفوظ رکھنے کے لیے وہاں موجود ہوتے ہیں۔
فلمی دنیا کی ’سربراہ کانفرنس‘
اس تصویر میں (بائیں سے دائیں) کن فلمی میلے کے صدر پیئر لیسکُور اور فرانسیسی وزیر ثقافت فلور پیلراں کے ساتھ ساتھ وہ اداکار بھی نظر آ رہے ہیں، جنہوں نے افتتاحی فلم ’اسٹینڈنگ ٹال‘ میں مرکزی کردار ادا کیے ہیں۔ اس تصویر میں فلم کی خاتون ڈائریکٹر ایمینوئل بیرکو بھی نظر آ رہی ہیں۔
ناطالی پورٹ مین بھی
اسرائیلی امریکی اداکارہ ناطالی پورٹ مین نے 2011ء میں فلم ’بلیک سوان‘ میں عمدہ اداکاری پر بہترین اداکارہ کا آسکر ایوارڈ حاصل کیا تھا۔ اس تصویر میں وہ کن میلے کی افتتاحی تقریب میں فوٹوگرافرز کو پوز دے رہی ہیں۔