امریکی فوج میں کمی کا منصوبہ

خبر رساں ادارے اے ایف پی نے پینٹاگون سے موصول ہونے والی اطلاعات کے حوالے سے بتایا ہے کہ امریکی وزیر دفاع چک ہیگل امریکی فوجیوں کی تعداد میں کمی کے حق میں ہیں۔ انہوں نے تجویز کیا ہے کہ اس وقت امریکا میں فوجیوں کی کل تعداد یعنی پانچ لاکھ بیس ہزار کو کم کر کے چار لاکھ چالیس اور پچاس کے درمیان لے آنا چاہیے۔

امریکی فوج کے آئندہ بجٹ کے خدوخال بیان کرتے ہوئے چیک ہیگل نے پیر 24 فروری کو کہا کہ عراق اور افغانستان کی جنگ کے بعد فوجی رہنما کسی مزید طویل المدتی عسکری مہم کے حق میں نہیں ہیں۔ اگر ان کا یہ منصوبہ کانگریس سے منظور ہو جاتا ہے تو امریکی فوجیوں کی کل تعداد 1940ء کے بعد سے پہلی مرتبہ کم ترین سطح پر پہنچ جائے گی۔ خیال رہے کہ دوسری عالمی جنگ اور سرد جنگ کے زمانے میں امریکی فوجیوں کی تعداد میں ڈرامائی حد تک بے پناہ اضافہ کیا گیا تھا۔

امریکی وزارت دفاع سے وابستہ ایک اعلیٰ اہلکار نے اپنا نام مخفی رکھنے کی شرط پر اے ایف پی کو بتایا ہے کہ اگر اس منصوبے کو حتمی منظوری مل جاتی ہے تو امریکی فوج میں 13 فیصد کمی کے اس مجوزہ منصوبے کو 2017ء تک پایہ تکمیل تک پہنچا دیا جائے گا۔ امریکی دفاعی بجٹ میں یہ کمی ایسے وقت میں تجویز کی گئی ہے، جب واشنگٹن حکومت کو بڑھتے ہوئے مالیاتی دباؤ کا سامنا ہے۔

عراق سے امریکی فوج پہلے ہی واپس بلائی جا چکی ہے جبکہ صدر باراک اوباما نے کہہ رکھا ہے کہ افغان نیٹو مشن کے بعد وہاں امریکی افواج مزید کسی عسکری مہم میں شریک نہیں ہوں گی۔ مغربی دفاعی اتحاد نیٹو کا افغان فوجی مشن رواں برس کے اواخر تک اختتام پذیر ہو جائے گا اور وہاں کی سکیورٹی کی ذمہ داریاں افغان فورسز کے سپرد کر دی جائیں گی۔

قبل ازیں پینٹا گون نے ملکی فوج کی تعداد میں کمی کرتے ہوئے اسے چار لاکھ نوے ہزار تک لانے کا عزم ظاہر کیا تھا۔ لیکن اب امریکی وزیر دفاع نے خبردار کیا ہے کہ مستقبل کے ممکنہ خطرات سے نمٹنے کے لیے محکمہ دفاع کو تیزی دکھاتے ہوئے فوج کی تعداد کو کم کرنا ہو گا۔ ان کا کہنا تھا کہ فوج کی تعداد میں کمی سے امریکا کی دفاعی صلاحیت کو کوئی فرق نہیں پڑے گا بلکہ یہ مزید تربیت یافتہ اور جدید اسلحہ جات سے لیس ہو جائے گی۔

اس مجوزہ بجٹ میں یہ بھی کہا گیا ہے کہ امریکی فضائیہ کے ’ورتھ ہوگ‘ طیاروں کے فلیٹ A-10 کو ناکارہ بنا دیا جائے گا جبکہ U-2 جاسوس طیاروں کو گراؤنڈ کر دیا جائے گا۔ اس کی جگہ نئے F-35 فائٹر طیاروں اور ’گلوبل ہاک‘ جاسوس طیاروں پر سرمایا کاری کرنے پر زور دیا گیا ہے۔

واضح رہے کہ 2001ء میں نائن الیون حملوں کے بعد امریکی دفاعی بجٹ دوگنا کر دیا گیا تھا۔ تاہم گزشتہ دہائی کے اواخر میں عالمی مالیاتی بحران کی وجہ سے کانگریس نے حکومتی اخراجات اور قرضوں میں کمی لانے کی کوششیں شروع کر دی تھیں۔ امریک فوج کا مجوزہ بجٹ بھی اسی تناظر میں تیار کیا گیا ہے۔ امریکا کا وفاقی بجٹ چار مارچ کو پیش کیا جائے گا۔