امریکی صدر جو بائیڈن کییف کے دورے کے بعد وارسا پہنچ گئے

امریکی صدر جو بائیڈن یوکرین پر روسی حملے کے ایک برس مکمل ہونے سے قبل دو روزہ دورے پر پیر کی شام کو پولینڈ کے دارالحکومت وارسا پہنچے۔ پولش ٹیلیویژن نے بائیڈن کی ایئر فورس ون کی اپنے ایئر پورٹ پر لینڈنگ کو نشر بھی کیا۔

جنگی ٹینکوں کے بعد یوکرین کے لیے آئندہ لڑاکا طیارے بھی؟

اس سے قبل وہ پیر کے روز اچانک یوکرین کے دارالحکومت کییف پہنچے تھے اور وہاں چند گھنٹوں کے قیام کے بعد وہ وارسا کے لیے روانہ ہوئے۔ کییف میں انہوں نے یوکرین کے صدر وولودیمیر زیلنسکی سے ملاقات کی تھی۔

یوکرین پر بات چیت کے لیے امریکی وزیر خارجہ کا دورہ یورپ

گزشتہ برس 24 فروری کو روسی حملے کے بعد امریکی صدر کا یوکرین کا یہ پہلا دورہ تھا۔ جنگ کے دوران ان کا دورہ کییف یوکرین کی حمایت کے لیے ان کا ایک مضبوط اشارہ سمجھا جا رہا ہے۔

زیلنسکی یورپ کے دورے پر، اتحادیوں کا مدد جاری رکھنے کا عزم

بائیڈن پولینڈ میں کیوں ہیں؟

امریکی صدر جو بائیڈن کا اچانک دورہ کییف کافی حیران کن تھا، تاہم وائٹ ہاؤس نے اس ماہ کے اوائل میں پولینڈ کے دو روزہ دورے کا اعلان کیا تھا۔ پولینڈ اپنی سرزمین پر مزید امریکی فوجیوں کی موجودگی کا خواہاں ہے۔

اتوار کے روز پولینڈ کے وزیر اعظم میٹیوز موراویکی نے امریکی نشریاتی ادارے سی بی ایس کے ساتھ ایک انٹرویو کے دوران کہا، ''ہم صدر جو بائیڈن کی انتظامیہ کے ساتھ ان کی موجودگی کو مزید مستقل بنانے اور اس میں اضافہ کرنے کے بارے میں بات چیت کر رہے ہیں۔''

گزشتہ جون میں بائیڈن نے کہا تھا کہ روس کی دھمکیوں کے جواب میں امریکہ پولینڈ میں ایک نیا مستقل فوجی ہیڈکوارٹر قائم کرنا چاہتا ہے۔

بائیڈن اپنے دورے کے دوران پولینڈ کے صدر آندریج ڈوڈا اور اعلیٰ مرکزی یورپی حکام سے بھی ملاقاتیں کرنے والے ہیں۔

کییف میں بائیڈن نے کیا کہا؟

بائیڈن کے دورہ کییف کا سیکورٹی وجوہات کی بنا پر پیشگی اعلان نہیں کیا گیا تھا، تاہم جانے سے عین قبل واشنگٹن نے ماسکو کو اس بارے میں آگاہ ضرور کر دیا تھا۔ یوکرین کے خلاف جنگ شروع ہونے کے بعد سے بائیڈن کا یہ پہلا دورہ تھا۔

انہوں نے وہاں پہنچ کر کہا، ''جب دنیا یوکرین پر روس کے وحشیانہ حملے کی پہلی سالگرہ کی تیاری کر رہی ہے، میں آج صدر زیلنسکی سے ملاقات کرنے اور یوکرین کی جمہوریت، خود مختاری اور علاقائی سالمیت کے لیے اپنے غیر متزلزل عزم کا اعادہ کرنے کے لیے کییف میں ہوں۔''

وائٹ ہاؤس کا کہنا ہے کہ صدر جو بائیڈن جلد ہی یوکرین کو مزید سازو سامان کی فراہمی کا اعلان کریں گے، جس میں توپ خانہ گولہ بارود، اینٹی آرمر سسٹم اور فضائی نگرانی کے ریڈار شامل ہیں۔

ص ز/ ج ا (ڈی پی اے، روئٹرز)