امریکا نے وکی لیکس کے بانی کا بیان مسترد کر دیا

جولیان اسانج برطانیہ سے بے دخلی سے بچنے کے لیے لندن میں ایکواڈور کے سفارت خانے میں پناہ لیے ہوئے ہیں۔ سفارت خانے کی بالکونی سے اپنے حامیوں سے اتوار کے روز خطاب کرتے ہوئے انہوں نے امریکا پر الزام عائد کیا تھا کہ وکی لیکس پر خفیہ امریکی دستاویزات کے شائع ہونے کے بعد سے امریکی حکومت انہیں پکڑنے کی کوششوں میں ہے۔

امریکی وزارت خارجہ کی ترجمان وکٹوریا نولینڈ نے پیر کے روز کہا کہ برطانیہ کی جانب سے اسانج کی سویڈن بے دخلی سے امریکا کا کوئی تعلق نہیں۔ واضح رہے کہ جولیان اسانج زنا بالجبر کے الزامات کے تحت سویڈن میں مطلوب ہیں اور برطانیہ کی عدالت ان کی بے دخلی کے احکامات جاری کر چکی ہے تاہم اسانج ایکوڈور کے سفارت خانے میں پناہ لیے ہوئے ہیں۔

وکٹوریا نیولینڈ نے اپنے بیان میں کہا، ’وہ ہمارے بارے میں تمام طرح کے سخت الزامات عائد کر رہے ہیں حالانکہ یہ برطانوی حکومت کا مسئلہ ہے کہ آیا انہیں سویڈن کے حوالے کیا جائے جہاں وہ عدل کا سامنا کریں۔ اس کا وکی لیکس سے کوئی تعلق نہیں۔ یہ جنسی حملے کے الزامات کا معاملہ ہے۔‘

نولینڈ نے کہا، ’ وہ اصل مسئلے سے توجہ ہٹانے کی کوشش کر رہے ہیں، جو سویڈن میں ان کے انصاف کا سامنا کرنے سے متعلق ہے۔‘‘

نولینڈ نے واضح الفاظ میں کہا کہ اس معاملے کا امریکا سے کوئی تعلق نہیں۔ ’یہ برطانیہ اور سویڈن کا معاملہ ہے جس میں اب ایکوڈور نے بھی خود کو شامل کر لیا ہے۔‘

at / ai (Reuters)