امریکا نے بگرام جیل افغان حکومت کے حوالے کر دی

کابل حکومت کی جانب سے بگرام جیل کی حوالگی کو ملکی سالمیت کے لیے ایک فتح سے تعبیر کیا جا رہا ہے۔ مبصرین کے مطابق بگرام جیل کی افغان فورسز کو منتقلی افغانستان سے سن 2014ء میں غیر ملکی فوجیوں کے انخلا کے سلسلے کی ایک کڑی ہے۔

بگرام جیل جسے افغان حکومت نے پروان حراستی مرکز کا نام دیا ہے، میں مجموعی طور پر تین ہزار سے زائد قیدی موجود ہیں، جن میں سے 50 غیرملکی ہیں۔ ان غیر ملکی قیدیوں میں زیادہ تعداد پاکستانیوں کی ہے۔ اس جیل کی منتقلی کے حوالے سے دونوں ممالک کے درمیان معاہدہ رواں برس نو مارچ کو ہوا تھا، تاہم اس معاہدے میں قیدیوں کے مستقبل کے حوالے سے کوئی لائحہ عمل طے نہیں کیا گیا تھا۔

اس سے قبل افغان حکومت نے اس جیل کی منتقلی کے حوالے سے کسی بھی تاخیر کو مسترد کر دیا تھا۔ کابل کے جنوب میں امریکی فوجی اڈے سے متصل اس جیل کی افغان فورسز کو منتقلی کی تقریب اتوار کو منعقد ہوئی۔

افغان صدر حامد کرزئی کے ترجمان ایمل فیضی نے کہا ہے کہ مارچ میں دونوں ممالک کے درمیان طے پانے والی یادداشت کی تشریح کے حوالے سے اختلافات پائے جاتے ہیں۔ اس معاہدے کے بعد اس حراستی مرکز میں لائے جانے والے افراد کی افغان فورسز کو حوالگی کی بابت بھی افغان اور واشنگٹن حکومت کے درمیان کوئی اتفاق رائے موجود نہیں ہے۔

ادھر نیٹو کے ترجمان نے بتایا ہے کہ اس جیل میں 99 فیصد قیدیوں کو افغان سکیورٹی فورسز کے سپرد کر دیا گیا ہے جبکہ باقی قیدیوں کی منتقلی کے بارے میں افغان حکومت فیصلہ کرے گی۔۔

حکام کا کہنا ہے کہ بگرام جیل میں قید 50 غیر ملکی قیدی، جن میں سے زیادہ تر تعداد پاکستانیوں کی ہے، کی حیثیت کا تعین 9 مارچ کا معاہدہ نہیں کرتا۔ یہی معاملہ افغان اور واشنگٹن حکومت کے درمیان کسی اتفاق رائے کی راہ میں رکاوٹ ہے۔

at / ai (AFP)