افغانستان میں امریکی میجر جنرل کی ہلاکت

امریکی وزارت دفاع کے ترجمان ریئر ایڈمرل جان کِربی نے تصدیق کرتے ہوئے بتایا کہ منگل کے روز ايک افغان فوجی کی فائرنگ سے امریکی فوج کے میجر جنرل کی ہلاکت ہوئی ہے۔ افغان فوجی کی فائرنگ سے دیگر پندرہ افراد زخمی بھی ہوئے اور اِن میں کئی کی حالت تشویشناک بتائی گئی ہے۔ ریئر ایڈمرل جان کِربی نے منگل کے روز ہونے والے اس حملے کو ایک انتہائی افسوسناک واقعے سے تعبیر کیا۔ امریکی صدر باراک اوباما اور وزیر دفاع چک ہیگل نے فوجی افسر کی ہلاکت کے بعد افغانستان میں اعلیٰ ترین امریکی کمانڈر جنرل ڈنفورڈ سے فون پر گفتگو بھی کی۔ تجزیہ کاروں کے مطابق افغانستان سے انخلاء کے سال کے دوران اعلیٰ امریکی فوجی افسر کی ہلاکت ایک انتہائی بڑا نقصان ہے۔

کِربی کے مطابق جوابی فائرنگ میں افغان فوج کی وردی میں ملبوس حملہ آور کو بھی ہلاک کر دیا گیا۔ امریکی وزارت دفاع کے ترجمان نے میجر جنرل کا نام اور دوسری تفصیلات بتانے سے گریز کیا البتہ واشنگٹن پوسٹ اخبار کے مطابق ہلاک ہونے والے فوجی افسر میجر جنرل ہیرالڈ جے گرین ہیں۔ ویتنام کی جنگ سے لے کر اب تک چھ امریکی میجر جنرل ہلاک ہو چکے ہیں۔ پانچ میجر جنرلز ویتنام کی جنگ میں مارے گئے تھے۔ عراق میں امریکی فوج کشی کے دوران کسی اعلیٰ امریکی فوجی افسر کی ہلاکت نہیں ہوئی تھی۔

ہیرالڈ جے گرین امریکی فوج کے ہیڈکوارٹرز میں بھی تعینات رہ چکے ہیں۔ وہ پیشے کے اعتبار سے تربیت یافتہ انجینئر تھے۔ وہ نیو یارک سے تعلق رکھتے ہیں۔ انہوں نے جنوبی کیلیفورنیا یونیورسٹی سے میٹیریل سائنس میں پی ایچ ڈی کر رکھی تھی۔ یہ امر اہم ہے کہ ستمبر گیارہ سن 2001 کے دہشتگردانہ واقعات کے دوران امریکی فوج کے لیفٹیننٹ جنرل ٹموتھی جوزف ماؤد کو ایک ہوائی جہاز میں دہشتگرد نے ہلاک کر دیا تھا۔ اُن کے بعد میجر جنرل ہیرالڈ گرین سب سے ہائی رینک امریکی فوجی افسر ہیں جن کی ہلاکت ہوئی ہے۔

ایک امریکی اہلکار نے نام مخفی رکھنے کی شرط پر بتایا کہ زخمیوں میں آٹھ امریکی شامل ہیں۔ زخمیوں کی قومیت بارے کوئی تفصیل عام نہیں کی گئی لیکن جرمن فوج کے مطابق ایک جرمن جنرل بھی زخمیوں میں شامل ہے۔ جرمن فوجی افسر بریگیڈئر جنرل رینک کا بتایا گیا ہے۔ اسی طرح دو افغان فوجی جرنیل بھی زخمی ہیں۔ امریکی وزارت دفاع کے ترجمان ریئر ایڈمرل جان کِربی نے یہ واضح کیا کہ امریکی اور افغان فوج کے درمیان کوئی بداعتمادی نہیں پائی جاتی اور افغان فوجی کی فائرنگ ایک انفرادی فعل ہے اور یہ ساری فوج کا عمل نہیں ہے۔ کِربی کا یہ بھی کہنا ہے کہ اِس وقت افغان فوجی اپنے ملک میں انتخابی عمل کو حتمی شکل دینے میں مصروف ہیں۔