افغانستان سے تمام دستے نہیں نکالے جائیں گے، امریکا

امریکی حکام کا کہنا ہے کہ افغان صدر حامد کرزئی کو یہ بات سمجھنا ہو گی کہ دونوں ممالک کے درمیان سلامتی معاہدہ انتہائی ضروری ہے تاکہ کچھ امریکی دستے سن 2014 کے بعد بھی افغانستان میں قیام کر سکیں۔

امریکی انتظامیہ کی جانب سے یہ بیان نیویارک ٹائمز کی اس رپورٹ کے ایک روز بعد سامنے آیا ہے، جس میں کہا گیا تھا کہ صدر باراک اوباما سنجیدگی سے غور کر رہے ہیں کہ سن 2014ء میں افغانستان میں تمام تر امریکی فوجی مداخلت ختم کر دی جائے۔ اخباری رپورٹ کے مطابق اس کی وجہ امریکی انتظامیہ اور افغان صدر کرزئی کے درمیان پائے جانے والے اختلافات ہیں۔

قطر میں طالبان کے دفتر کے قیام کے بعد کابل حکومت نے امریکا کے ساتھ اسٹریٹیجک معاہدے کے لیے جاری مذاکرات منسوخ کرنے کا اعلان کر دیا تھا۔ کابل حکومت کا کہنا تھا کہ افغانستان میں مفاہمتی عمل کے لیے امن مذاکرات افغان سرپرستی میں ہونے چاہییں۔ واضح رہے کہ قطر میں طالبان کے دفتر کے قیام کو امریکی حمایت حاصل تھی۔

امریکی سینیٹ کی خارجہ امور کی کمیٹی کے سامنے ایک سماعت کے دوران وزارت خارجہ کے خصوصی مندوب برائے افغانستان اور پاکستان جیمز ڈوبِنز نے جمعرات کو اپنے ایک بیان میں کہا، ’کسی معاہدے کے بغیر ہم افغانستان میں قیام نہیں کریں گے۔ مگر ہمیں ایسا نہیں لگتا کہ مذاکرات کا کوئی ایسا نتیجہ نکل سکتا ہے۔‘

انہون نے مزید کہا، ’افغان کا عراق کے ساتھ موازنہ درست نہیں کیوں کہ افغان عوام کو ضرورت ہے کہ ہم وہاں قیام کریں۔ زیادہ تر افغان شہری یہی چاہتے بھی ہیں اور ہم نے ان سے وعدہ کر رکھا ہے۔‘

افغانستان میں اس وقت بھی تقریباﹰ ساٹھ ہزار امریکی فوجی تعینات ہیں۔ مگر اگلے برس کے آغاز تک ان کی تعداد 34 ہزار رہ جائے گی۔ تاہم امریکی انتظامیہ کابل حکومت کے ساتھ ان مذاکرات میں مصروف ہے، جن کے تحت تقریباﹰ آٹھ ہزار فوجی سن 2014 کے بعد بھی افغانستان میں قیام کر سکیں گے۔

دوسری جانب امریکی حکام کا یہ بھی کہنا ہے کہ پینٹاگون اور امریکی فوجی کمانڈروں کی جانب سے بار بار زور دیا جاتا رہا ہے کہ افغانستان میں سن 2014 کے بعد بھی محدود امریکی فوجی موجودگی ضروری ہے تاہم اب تک کسی باقاعدہ معاہدے کے طے نہ پانے کی وجہ سے وہاں ’زیرو آپشن‘ کو خارج از امکان قرار نہیں دیا جا سکتا۔