افغان طالبان کے حملے میں 28 پولیس اہلکار ہلاک

خبر رساں ادارے اے ایف پی کی کابل سے موصولہ اطلاعات میں بتایا گیا ہے کہ طالبان باغیوں نے منگل کے دن دارالحکومت کابل کے نواح میں واقع پلِ علَم نامی شہر کے ایک پولیس اسٹیشن پر حملہ کیا۔ صوبائی پولیس سربراہ عبدالحکیم اسحاق زئی نے بتایا کہ اس حملے میں نو افراد زخمی بھی ہوئے ہیں۔ دسمبر کے آخر میں نیٹو کے افغان مشن کے اختتام کے بعد سے افغان سکیورٹی فورسز پر طالبان کا یہ پہلا بڑا حملہ ہے۔

یہ امر اہم ہے کہ افغان سکیورٹی فورسز نے پیر کے دن چھ ضلعوں میں طالبان کے خلاف ایک بڑی کارروائی شروع کی تھی۔ منگل کے دن کیا گیا طالبان کا یہ حملہ اس کارروائی کے جواب میں ہے۔ ادھت قندھار میں بھی چھ افغان سکیورٹی اہلکار ہلاک ہوئے تھے اور یوں مجموعی طور پر ان دو دنوں میں 28 سکیورٹی اہلکار مارے گئے ہیں۔ حکام نے بتایا ہے کہ پیر کے دن 76 شدت پسند ہلاک ہوئے تھے۔

افغان سکیورٹی اہلکاروں کی طرف سے شروع کیے گئے تازہ عسکری آپریشن کا مقصد طالبان کے گڑھ تصور کیے جانے والے علاقوں میں ان کا زور توڑنا ہے۔ اس آپریشن کے ایک کمانڈر جنرل عبدالخالق نے اے ایف پی کو بتایا، ’’یہ آپریشن مکمل طور پر افغان سکیورٹی اور خفیہ اداروں کی طرف سے پلان کیا گیا ہے۔ یہ اس وقت تک جاری رہے گا جب تک مکمل کامیابی حاصل نہیں ہوتی۔‘‘

افغان سکیورٹی فورسز کے ان بیانات کے حوالے سے طالبان کی طرف سے ابھی تک کوئی تبصرہ نہیں کیا گیا۔ کابل میں ملکی وزارت دفاع کے مطابق غیر ملکی فوجی مشن کے خاتمے کے بعد افغان حکومت کے ’ذوالفقار‘ نامی اس آپریشن کے علاوہ دیگر مشن بھی ترتیب دیے گئے ہیں۔ فوجی ترجمان جنرل دولت وزیری نے بتایا، ’’طالبان کے خلاف افغان فوج کی طرف سے ترتیب دیا گیا یہ آپریشن نہ تو پہلا ہے اور نہ ہے آخری۔‘‘

نیٹو کے افغانستان مشن کے بعد کئی ماہرین نے خبردار کیا تھا کہ افغان سکیورٹی فورسز طالبان کے حملوں کو روکنے کے لیے مکمل طور پر تیار نہیں ہیں۔ سابق افغان جنرل عتیق اللہ امرخیل نے اے ایف پی کو بتایا، ’’سن 2015 افغان سکیورٹی فورسز کے لیے امتحان کا سال ہو گا کیونکہ اب انہیں اپنے طور پر شدت پسندوں سے نبرد آزما ہونا پڑے گا۔‘‘ انہوں نے مزید کہا کہ امریکی اور افغان حکام جانتے ہیں کہ اس برس طالبان اپنے حملوں میں اضافہ کر دیں گے۔

اقوام متحدہ کے اعداد و شمار کے مطابق گزشتہ برس رونما ہونے والے تشدد کے نتیجے میں تین ہزار افغان شہری ہلاک ہوئے تھے، 2013ء کے مقابلے میں ہلاکتوں کی یہ شرح اٹھارہ فیصد زیادہ تھی۔ پینٹاگون کا کہنا ہے کہ اسی طرح گزشتہ برس پانچ ہزار افغان فوجی اور پولیس اہلکار لقمہ اجل بنے تھے۔