افغان طالبان کا وفد تہران میں، ایرانی نیوز ایجنسی

ایرانی دارالحکومت سے منگل انیس مئی کے روز موصولہ امریکی نیوز ایجنسی ایسوسی ایٹڈ پریس کی ’تسنیم‘ کے حوالے سے ملنے والی رپورٹوں میں بتایا گیا ہے کہ افغان طالبان کے اس وفد کی قیادت طیب آغا کر رہے ہیں۔ طیب آغا خلیج کی عرب ریاست قطر میں افغان طالبان کے سیاسی رابطوں کے دفتر کے سربراہ ہیں۔

ایسوسی ایٹڈ پریس کے مطابق اس وفد نے ایران میں سکیورٹی حکام کے ساتھ ملاقات کی ہے اور ماضی میں بھی افغانستان میں کابل حکومت کے خلاف مسلح مزاحمت کرنے والے طالبان عسکریت پسندوں کے سیاسی نمائندوں کے ایسے ہی وفد دو مرتبہ ایران کے دورے کر چکے ہیں۔

نیم سرکاری ایرانی نیوز ایجنسی ’تسنیم‘ نے اپنی رپورٹوں میں یہ نہیں بتایا کہ آیا اس افغان وفد کی ایران میں موجودگی کے دوران اعلٰی ایرانی سیاسی اہلکار بھی اس وفد کے ساتھ مذاکرات کریں گے۔

امریکا پر نائن الیون کے دہشت گردانہ حملوں کے بعد افغانستان میں امریکی قیادت میں کی جانے والی بین الاقوامی فوجی مداخلت کے نتیجے میں اقتدار سے بےدخل کر دیے جانے والے طالبان ماضی میں کئی سال تک اس ملک پر حکمران رہے ہیں۔

سخت گیر سنی مذہبی نظریات کے حامل افغان طالبان ایسے اسلامی عقیدے کی نمائندگی کرتے ہیں، جو شیعہ اسلامی عقائد سے واضح طور پر متصادم ہے۔ 1990 کی دہائی کے آخری سالوں میں، جب افغانستان میں طالبان کی حکومت تھی، کابل اور تہران کے باہمی تعلقات اس حد تک کشیدہ ہو گئے تھے کہ معاملہ شیعہ اکثریتی آبادی والے ایران کے ساتھ تقریباﹰ جنگ کی حد تک پہنچ گیا تھا۔