افغان صدر کی فائربندی کی پیشکش طالبان نے مسترد کر دی

افغان صدر اشرف غنی کی جنگ بندی کی پیشکش کو ٹھکرانے کا اعلان طالبان کی جانب سے پیر اکیس اگست کو کیا گیا۔ اس اعلان میں طالبان نے حکومتی مقامات، پولیس اور فوجیوں پر حملے جاری رکھنے کا اعلان کیا ہے۔ دو طالبان کمانڈروں نے نام مخفی رکھنے کی شرط پر بتایا کہ اُن کی اعلیٰ قیادت نے فائربندی کو تسلیم نہ کرنے کا فیصلہ کیا ہے۔

افغان صدر اشرف غنی نے تین ماہ کی عبوری جنگ بندی عید الالضحیٰ کے دن سے شروع کرنے کا اعلان کیا تھا۔ پیر بیس اگست تک طالبان ذرائع سے ایسی اطلاعات سامنے آئی تھیں کہ طالبان کی قیادت نے چار ایام کی عبوری فائربندی پر اتفاق تو کیا ہے لیکن اس کا باضابطہ اعلان نہیں کیا۔ یہ بھی کہا گیا تھا کہ طالبان عید کے موقع پر سینکڑوں قیدیوں کو رہا کرنے کا ارادہ رکھتے ہیں، مگر ایسا نہیں ہو سکا۔

یہ امر بھی اہم ہے کہ رواں برس جون میں طالبان نے عیدالفطر کے موقع پر سہ روزہ جنگ بندی کی تھی اور تب ایسے امکانات پیدا ہوئے تھے کہ اگلی عید پر طالبان رہنما ایک مرتبہ پھر فائربندی کا اعلان کر کے امن عمل کے سلسلے کو تسلسل دیں گے۔ تاہم عیدالالضحیٰ پر اس عسکریت پسند گروہ کی قیادت نے کوئی مثبت فیصلہ نہیں کیا۔

ایسی اطلاعات بھی سامنے آئی ہیں کہ طالبان کے رہنما شیخ ہیبت اللہ اخوندزادہ نے طالبان رہنماؤں کی فائربندی تسلیم کرنے کی تجویز سے اتفاق نہیں کیا اور یہ کہہ کر اسے مسترد کر دیا کہ فائربندی امریکی فوجی مشن کو مزید استحکام دینے کا باعث بن سکتی ہے۔

افغان طالبان کے ایک سینیئر کمانڈر نے اپنا نام مخفی رکھتے ہوئے ٹیلی فون پر نیوز ایجنسی روئٹرز کو بتایا کہ اُن کی قیادت محسوس کرتی ہے کہ فائربندی کے اعلانات امریکی فوج کے افغانستان میں قیام میں توسیع کا باعث بن سکتے ہیں۔

دوسری جانب کابل حکومت کا خیال ہے کہ اگر صدر غنی کی فائربندی کی پیشکش کا مثبت جواب نہ دیا گیا تو عبوری اور مشروط جنگ بندی کی تجویز کو منسوخ بھی کیا جا سکتا ہے اور حکومت اپنے فوجی آپریشن کے سلسلے کو بحال کر دے گی۔ تاہم ابھی تک واضح نہیں ہے کہ افغان صدر اپنی جنگ بندی کی تجویز کب واپس لیں گے جس کے بعد ملکی فوج طالبان کے خلاف اپنی عسکری کارروائیاں دوبارہ شروع کرے گی۔