اسرائیلی وزیراعظم جمعرات کو ابو ظہبی پہنچیں گے

اسرائیلی  وزیراعظم کا یہ دورہ فروری میں ہونا تھا جسے کورونا کے باعث ملتوی کیا گیا۔

اسرائیلی اور امارتی حکام نے ابھی اس دورے کی کوئی تفصیلات جاری نہیں کیں۔ تاہم اسرائیلی میڈیا کے مطابق بینجمن نیتن ابو ظہبی میں امارات کے ولی عہد شیخ محمد بن زید النہیان سے ملاقات کریں گے اور اسے دن اسرائیل واپس روانہ ہو جائیں گے۔

ابھی یہ واضح نہیں کہ اس ایک روزہ دورے میں وہ بحرین بھی جائیں گے یا نہیں۔

اسرائیلی وزیراعظم نے گزشتہ ماہ اپنے اس دورہ کو خطے میں اسرائیل کی دفاعی اور اقتصادی سکیورٹی کے لیے اہم قرار دیا تھا۔

ان کا یہ دورہ ملک میں عام انتخابات سے دس روز پہلے ہونے جا رہا ہے۔ اسرائیلی سیاست چند برسوں سے شدید منقسم ہوچکی ہے جس کے باعث ملک میں دو سال کے اندر چوتھی بار انتخابات ہونے جارہے ہیں۔

اسرائیل نے پچھلے سال امریکی صدر ٹرمپ کی ثالثی میں متحدہ عرب امارات اور بحرین کے ساتھ سفارتی تعلقات قائم کرنے کا اعلان کیا تھا۔ پچھلے چھ ماہ کے دوران دونوں طرف کے سفارتی اور کاروباری وفود نے ایک دوسرے کے ممالک کے پہلی بار باضابطہ دورے کیے ہیں۔

اسرائیل اور سعودی عرب سمیت بیشتر خلیجی عرب ممالک مشرق وسطیٰ میں ایران کے اثر اور اس کے نیوکلیئر پروگرام کو اپنے لیے خطرہ سمجھتے ہیں۔

اسرائیل کے اپنے پڑوسی عرب ملکوں مصر اور اردن کے ساتھ برسوں پرانے تعلقات ہیں۔ صدر ٹرمپ کے آخری سال کے دوران اسرائیل نے مزید ملکوں کے ساتھ تیزی سے رشتے قائم کرنے کی  کوششیں کیں۔

نیتن یاہو اسرائیل تسلیم کرانے کی اس مہم کو ''امن و استحکام کا مشن‘‘  قرار دیتے ہیں لیکن فلسطینیوں اور مسلم دنیا کے لوگوں میں اس پر سخت غم و غصہ پایا جاتا ہے۔

ش ج / ا ب ا (ڈی پی اے، اے ایف پی)