اسرائیلی حملے میں نقصان ’محدود‘ رہا، ایران

خبر رساں ادارے اے ایف پی کے مطابق امریکہ سمیت اسرائیل کے دیگر قریبی اتحادی ممالک کی اپیلوں کے تناظر میں اسرائیلی طیاروں نے حساس ایرانی مقامات کو نشانہ بنانے سے احتراز برتا۔ امریکہ اوریورپی ممالک اسرائیل سے درخواست کرتے رہے ہیں کہ وہ ایرانی جوہری تنصیبات اور آئل فیلڈز کو نشانہ نہ بنائے۔

رواں برس یکم اکتوبر کو ایران کی جانب سے اسرائیل پر دو سو بیلسٹک میزائلوں کے ذریعے حملہ کیا گیا تھا، جس کے ردعمل میں اسرائیل نے ایران کو موثر جواب دینے کا عندیہ دیا تھا۔ تاہم ہفتے کے روز ایرانی سرزمین پر اس انداز کی براہ راست کارروائی کے باوجود یہ واضح نہیں ہے کہ آیا اس سے اس مسلح تنازعے میں مزید کشیدگی آئے گی۔

اسرائیلی حملوں کی تین لہریں

اسرائیلی فوج کے مطابق متعدداسرائیلی لڑاکا طیاروں نے تین حصوں میں ایرانی میزائل فیکٹریوں اور دیگر عسکری اہداف کو نشانہ بنایا اور خبردار کیا ہے کہ ایران جوابی ردعمل سے اجتناب برتے۔

بتایا گیا ہے کہ ایرانی فضائی حدود ان اسرائیلی حملوں کے آغاز تک کھلی ہوئی تھی، جسے حملوں کے بعد بند کیا گیا اور اسرائیل کی جانب سے آپریشن کی تکمیل کے اعلان کے بعد دوبارہ کھول دیا گیا۔

اسرائیلی حملوں میں ''محدود‘‘ نقصان ہوا، ایران

ایران کی جانب سے ان حملوں کے بعد کہا گیا ہے کہ ملک کے فضائی دفاعی نظام نے کامیابی کے ساتھ اسرائیلی حملوں کو روکا۔ تاہم ایرانی بیان کے مطابق ان حملوں میں دو ایرانی فوجی ہلاک ہو گئے ہیں جب کہ چند مقامات کو ''محدود نقصان‘‘ پہنچا ہے۔ ایک ایرانی نیم سرکاری خبر رساں ادارے پر اسرائیلی حملے کا ‘مناسب جواب‘ دینے کا اعلان کیا گیا ہے۔

واضح رہے کہ ایران اور اسرائیل کے درمیان کشیدگی گزشتہ برس سات اکتوبر کو اسرائیل پر حماس کے دہشت گردانہ حملے اور جواب میں غزہ میں اسرائیل کی وسیع فضائی اور زمینی عسکری کارروائیوں کے بعد سے جاری ہے، تاہم رواں برس یکم اکتوبر کو اسرائیل پر ایران کی جانب سے دو سو بلیسٹک میزائلوں کے ذریعے کیے گئے حملے کے بعد یہ کشیدگی مزید بڑھ گئی تھی۔ ان ایرانی حملوں میں اسرائیل کے زیرقبضہ مغربی کنارے میں ایک شخص ہلاک ہو گیا تھا۔ ایران نے ان حملوں کی وجہ اس سے پیش تر کی اسرائیلی کارروائیوں کو قرار دیا تھا۔

امریکہ اور مشرق وسطیٰ کے ممالک کی جانب سے برداشت پر زور

امریکہ اور مشرق وسطیٰ کی ریاستوں کی جانب سے فریقین سے صبروتحمل کا مظاہرہ کرنے کا مطالبہ کیا جا رہا ہے، تاہم تمام نگاہیں ایران کے ممکنہ جواب پر بھی ٹکی ہیں۔

ایرانی وزارت خارجہ نے کہا ہے کہ ایران اپنے دفاع کا ''حق اور فرض‘‘ محفوظ رکھتا ہے، تاہم ساتھ ہی ایرانی بیان میں خطے میں امن و سلامتی کے حوالے سے ایرانی ذمہ داریوں کو تسلیم کرنے کا بھی ذکر ہے۔

دوسری جانب روئٹرز نے ایرانی حکومتی ذرائع کے حوالے سے بتایا ہے کہ ان حملوں کے بعد متعدد اعلیٰ سطحی ایرانی ملاقاتیں ہوئیں ہیں، جن میں اسرائیلی حملوں کے جواب میں ایرانی کارروائیوں کے حیطے پر غور کیا گیا ہے۔

اسرائیل نے دوسری جانب کہا ہے کہ اسے فوری ایرانی ردعمل کی توقع نہیں ہے اور اسی تناظر میں شہریوں کو سلامتی کے حوالے سے کوئی خاص ہدایات بھی جاری نہیں کی گئی ہیں۔

ع ت، ا ا، ش ر (روئٹرز، اے ایف پی)