ادب و ثقافت کی دنیا سے، مختصر مختصر

برطانیہ کے پورٹریٹ بنانے میں مہارت رکھنے والے سرکردہ مصوروں میں سے ایک جوناتھن ژیو نے طالبان کے ایک حملے میں زخمی ہو جانے والی پاکستانی وادیء سوات کی اسکول طالبہ ملالہ یوسف زئی کا ایک پورٹریٹ تیار کیا ہے، جو گزشتہ بدھ سے لندن کی نیشنل پورٹریٹ گیلری میں نمائش کے لیے پیش کر دیا گیا ہے۔ اس ایک میٹر بلند روغنی تصویر میں سولہ سالہ ملالہ کو اپنا ہوم ورک کرتے ہوئے دکھایا گیا ہے۔ اس تصویر کی نمائش جنوری تک جاری رہے گی۔ ژیو کے مطابق ملالہ کا پورٹریٹ بنانا خود اُن کے لیے ایک اعزاز تھا۔

حال ہی میں لندن میں جیمز بانڈ سیریز کی فلم ’دی سپائی ہُو لوّڈ می‘ میں استعمال کی جانے والی وہ مشہور کار نیلام کی گئی ، جو ایک آبدوز کی شکل اختیار کر جاتی ہے۔ بتایا گیا ہے کہ یہ کار پانچ لاکھ پچاس ہزار پاؤنڈ میں نیلام ہوئی ہے۔ یہ فلم 1977ء میں ریلیز ہوئی تھی اور اس میں جیمز بانڈ کا مرکزی کردار برطانوی اداکار راجر مور نے ادا کیا تھا۔

کینیڈا میں ٹورنٹو کے مقام پر اڑتیسواں TIFF یعنی ٹورنٹو انٹرنیشنل فلم فیسٹیول پانچ ستمبر کو شروع ہوا تھا اور اتوار پندرہ ستمبر کو اپنے اختتام کو پہنچ رہا ہے۔ اس میلے میں پہلی مرتبہ نمائش کے لیے پیش کی جانے والی فلموں میں وکی لیکس کے بانی جولین آسانج کی زندگی پر مبنی فلم ’دی ففتھ اسٹیٹ‘ بھی شامل تھی۔ اس سال اس گیارہ روزہ میلے کے پروگرام میں ستّر ممالک سے گئی ہوئی 288 فیچر اور 78 مختصر فلموں کی نمائش شامل ہے۔ برلن، کن اور وینس کے بین الاقوامی فلمی میلوں کے برعکس ٹورنٹو فلمی میلے میں کسی جیوری کی بجائے فلم بین یہ فیصلہ کرتے ہیں کہ میلے کے اعلیٰ ترین اعزازات کن فلموں اور اداکاروں کے حصے میں آئیں گے۔

چینی ذرائع ابلاغ کے مطابق 400 ملین سے زیادہ چینی شہری اپنی قومی زبان مینڈارین بولنے سے قاصر ہیں جبکہ ملک کی آبادی کا ایک بڑا حصہ اس زبان کو بہت بُرے طریقے سے بولتا ہے۔ وزارتِ تعلیم نے زور دیا ہے کہ مینڈارین پڑھانے کے لیے زیادہ وسائل مختص کیے جائیں۔ 1998ء سے ہر سال چین کی قومی زبان کی ترویج و ترقی کی مہم چلائی جاتی ہے۔ اس سال عنقریب اس مہم کے موقع پر زیادہ توجہ نسلی اقلیتوں کے حامل علاقوں پر دی جائے گی۔ تبت کے باشندے اسکولوں میں مینڈارین کے استعمال کے خلاف سراپا احتجاج ہیں۔