اداکارہ کیرا نائٹلی اور جیمز رائٹن شادی کے بندھن میں

جنوبی فرانس کے قصبے مازاں (Mazan) کے میئر ایمی ناویلو نے بتایا ہے کہ ہفتے کے روز حسین اداکارہ کیرا نائٹلی نے اپنے ہم وطن موسیقار جیمز رائٹن کے ساتھ شادی کا بندھن باندھ لیا ہے۔ میئر ناویلو کے مطابق شادی کی تقریب انتہائی سادہ تھی۔ کل پندرہ مہمان شریک تھے۔ بعض دوسرے ذرائع نے مہمانوں کی تعداد دس بیان کی ہے۔ مہمانوں کا تعلق جوڑے کے خاندانوں سے تھا۔ شادی کے بارے میں میئر ناویلو نے نیوز ایجنسی ایسوسی ایٹڈ پریس کو بتایا۔

پانچ ہزار آبادی کے قصبے مازاں میں کیرا نائٹلی کے والدین کا ذاتی مکان بھی ہے۔ یہ قصبہ جنوبی فرانس کے علاقے واکلُوز (Vaucluse) میں واقع ہے۔ وہ یہ مکان تعطیلات کے دوران استعمال کرتے ہیں۔ مازاں کے میئر کے مطابق عروسی جوڑے میں برطانوی اداکارہ بہت سج دھج رہی تھیں۔ میئر ناویلو نے نائٹلی کی سادہ طبیعت کی بھی بہت تعریف کی۔ شادی کی رجسٹریشن کے بعد مہمانوں کے لیے پرتکلف استقبالیے یا ریسیپشن کا بھی انتظام کیا گیا تھا۔

جیمز رائٹن اور کیرا نائٹلی کا رومان سن 2011 سے جاری تھا، جو اب شادی میں تبدیل ہو گیا ہے۔ نائٹلی اور رائٹن نے گزشتہ برس ہی اپنی منگنی کا اعلان کیا تھا۔ منگنی کے بعد کیرا نائٹلی نے کہا تھا کہ وہ بڑی شادی کی تقریبات کی قائل نہیں ہے اور منگنی کے بعد کے عرصے سے لطف اندوز ہونا چاہتی ہے۔ کیرا نائٹلی کی یہ پہلی شادی ہے اور اس سے قبل وہ جیمی ڈورمین اور روپرٹ فرینڈ نامی اداکاروں کے ساتھ افیئر کا تذکرہ عام ہوا تھا۔

کیرا نائٹلی اٹھائیس برس کی ہیں اور وہ ماڈلنگ اور اداکاری میں عالمی شہرت رکھتی ہیں۔ اداکاری کا آغاز سن 1995 میں صرف دس برس کی عمر سے شروع کر دیا تھا۔ سن 2008 میں معتبر میگزین فوربز نے نائٹلی کو ہالی ووڈ اور انگلش فلم انڈسٹری کی دوسری سب سے مہنگی اداکارہ قرار دیا تھا۔ نائٹلی کو اکیڈیمی ایوارڈ کے نامزدگی حاصل ہو چکی ہے۔ ان کے کریڈٹ پر کئی نامی گرامی فلمیں ہیں۔ ان میں خاص طور پر پائریٹس آف دی کریبیئن (Pirates of the Caribbean) فلم سیریز نمایاں ہے۔

جیمزنکولس رائٹن کا تعلق انگلستان کے علاقے سے ہے۔ رائٹن کی عمر 29 برس ہے اور وہ پچیس اگست سن 1983 میں پیدا ہوا تھا۔ ان دنوں وہ لندن کے جدید موسیقی کے ایک مقامی بینڈ کلیکسنز (Klaxons) کے ساتھ منسلک ہے۔ وہ کی بورڈ خاص طور پر بجاتا ہے۔ اے لیول کا امتحان پاس کرنے کے بعد رائٹن نے کارڈیف یونیورسٹی میں ہسپانوی زبان و ادب اور سیاسیات کے مضامین کے ساتھ مزید تعلیم حاصل کی۔

(ah/sks(AFP