ای یو کے ایک درجن ممالک روسی گیس سپلائی میں کمی سے متاثر

یورپی یونین کی کلائمیٹ پالیسی کے سربراہ فرانز ٹمرمانز کا کہنا ہے کہ توانائی کے حوالے سے یورپی یونین اور ماسکو کے مابین تناؤ شدت اختیار کر رہا ہے۔ گزشتہ ہفتے روس نے نارڈ سٹریم ون گیس پائپ لائن سے گیس کی چالیس فیصد ترسیل کم کر دی تھی۔ ماسکو کا کہنا تھا کہ ایسا تکنیکی مسائل کی بنا پر کیا گیا ہے۔ روس پہلے ہی پولینڈ، بلغاریہ، نیدرلینڈز، ڈنمارک اور فن لینڈ کو معاوضہ ادا کرنے کے نئے نظام کے تحت ادائیگیاں نہ کرنے پر گیس کی سپلائی بند کر چکا ہے۔

ٹمرمنس کے مطابق یورپی یونین کے ستائیس ممالک میں سے دس نے گیس سپلائی کی کمی کے حوالے سے خبردار کر دیا ہے۔ یورپی توانائی سکیورٹی کے حوالے سے ابھی بحران شدہ صورتحال کی کم ترین سطح ہے۔ لیکن ٹمرمنس کا کہنا ہے، '' گیس کی کٹوتی کا خطرہ اب پہلے سے کہیں زیادہ ہے۔‘‘ انہوں نے کہا کہ روس توانائی کو ہتھیار کے طور پر استعمال کر رہا ہے۔ ماسکو اس الزام کو مسترد کرتا ہے۔

یوکرین پر حملے سے قبل یورپی یونین اپنی گیس ضروریات کا چالیس فیصد ماسکو سے حاصل کرتا تھا۔ اب ماسکو کی جانب سے گیس کی ڈگمگاتی سپلائی اور توانائی کی قیمتوں میں اضافہ، کچھ ممالک کو کوئلے کے پاور پلانٹس کے استعمال بڑھانے پر مجبور کر رہا ہے۔ ان ممالک کا کہنا ہے کہ ایسا عارضی طور پر کیا جارہا ہے اور اس بات کو بھی یقینی بنایا جائے گا کہ موسمیاتی تبدیلیوں سے متعلق اہداف متاثر نہ ہوں۔

جرمنی، بجلی کی پیداوار کے لیے گیس کے استعمال کو محدود کرنے کا فیصلہ

جرمنی جمعرات کو توانائی کے حوالے سے دوسرے ایمرجنسی الرٹ میں داخل ہو گیا ہے۔ یورپ کی سب سے بڑی معیشت نے مارچ میں ایمرجنسی پلان کی پہلی اسٹیج کو ایکٹیویٹ کر دیا تھا۔ ای یو ممالک کے پاس گیس سپلائی کے بحران کے حوالے سے تین لیولز ہیں اور ان ممالک کے پاس تینیوں مرحلوں میں گیس کی بحران سے نمٹنے کا پلان موجود ہونا چاہیے۔ پہلی اسٹیج جسے 'ارلی وارننگ‘ کہا جاتا ہے اس میں گیس کی ترسیل کا معائنہ کیا جاتا ہے۔ دوسری اسٹیج جیسے 'الارم‘ کہا جاتا ہے، اس میں توانائی کی قیمتوں کو بڑھا دیا جاتا ہے تاکہ گیس کی مانگ میں کمی پیدا کی جا سکے۔ آخری لیول جسے 'ایمرجنسی‘ کہا جاتا ہے، حکومتوں کو یہ حق دیتی ہے کہ وہ گیس کے استعمال کو کم کرنے کے لیے انڈسٹریوں کو اپنی کاروباری سرگرمیاں کم کرنے کے لیے کہہ سکتی ہیں۔

روس کی جانب سے گیس کی کٹوتیوں نے ان خدشات کو جنم دیا ہے کہ یورپ کو اب گیس کے ذخیرے، جو اس وقت 55 فیصد تک ہیں، انہیں زیادہ کرنے کے لیے فوری اقدامات کرنا ہوں گے۔ یورپی یونین نے گزشتہ ماہ ایک ایمرجنسی قانون پر اتفاق کیا تھا، جس کے تحت یونین کے رکن ممالک کو اس سال یکم نومبر تک گیس کے ذخیرے کو 80 فیصد تک کرنا ہو گا۔

ب ج/ا ب ا (روئٹرز)