2014: سوچی اولمپکس اور برازیل ورلڈ کپ کا سال

یہ دونوں ایونٹس صرف کھیل کے میدانوں ہی میں نہیں بلکہ ان سے باہر کے معاملات کے حوالے سے بھی خبروں میں بڑی سرخیاں بنے رہے۔

روسی شہر سوچی میں ہونے والے ان کھیلوں پر مجموعی طور پر 51 بلین ڈالرز خرچ کیے گئے۔ تاریخ کے مہنگے ترین سرمائی اولمپکس میں میزبان روس میڈل ٹیبل پر بھی سرفہرست رہا۔ تاہم فیفا ورلڈ کپ کے میزبان ملک برازیل کو نہ صرف سیمی فائنل میں جرمنی کے ہاتھوں سات کے مقابلے میں ایک گول کی عبرتناک شکست برداشت کرنی پڑی بلکہ یہ وکٹری اسٹینڈ تک پہنچنے میں بھی ناکام رہا اور چوتھی پوزیشن حاصل کی۔ اس ورلڈ کا فاتح جرمنی رہا۔

کھیل کے میدان میں جرمن گول کیپر مانویل نوئر معروف ترین کھلاڑیوں پرتگال کے کرسٹیانو رینالڈو اور ارجنٹائن کے لیونل میسی کے سامنے سیسہ پلائی ہوئی دیوار ثابت ہوئے اور یہ دونوں کھلاڑی نوئر کے خلاف گول نہ کر پائے۔ مانویل نوئر اب گزشتہ چھ سالوں کے دوران ورلڈ فٹبالر آف دا ایئر یا سال کے بہترین فٹبالر کا اعزاز جیتنے والے ان دونوں کھلاڑیوں کے مقابلے میں اس اعزاز کے لیے بھی مضبوط ترین امیدوار ہیں۔

فٹبال کے اس سب سے بڑے سالانہ انعام کا اعلان اگلے برس 12 جنوری سے قبل نہیں کیا جائے گا۔ یہ وقت نوئر کی ٹیم یعنی جرمنی کی طرف سے 13 جولائی کو ریو ڈی جنیرو میں کھیلے جانے والے فائنل میں میسی کی ٹیم ارجنٹائن کو صفر کے مقابلے میں ایک گول سے شکست دینے کے چھ ماہ کے اندر بنتا ہے۔

جرمن ٹیم نے ٹورنامنٹ کا آغاز رونالڈو کی ٹیم پرتگال کے خلاف صفر کے مقابلے میں چار گولوں کی شاندار فتح سے کیا تاہم یوآخم لوو کی اس ٹیم کی اس ورلڈ کپ کے دوران سب سے بڑی اور یادگار فتح میزبان ملک برازیل کے خلاف تھی جس کا اہم تین کھلاڑی نیمار انجری کے باعث میدان کے باہر میچ دیکھنے کے علاوہ اپنی ٹیم کی کوئی اور مدد نہ کر پایا۔

ورلڈ کپ سے قبل فٹبال کے اس سب سے بڑے ایونٹ کے برازیل میں انعقاد پر تحفظات کا اظہار کیا جا رہا تھا تاہم تحفظات رکھنے والوں کی توقع کے برعکس یہ ایونٹ کامیاب ثابت ہوا۔ اسی بدولت اب یہ امید بھی بڑھ گئی ہے کہ برازیلی دارالحکومت ریو ڈی جنیرو میں ہونے والے 2016ء کے اولمپکس کھیلوں کا انعقاد بھی کامیاب ثابت ہو گا۔