12 لڑکوں اور ان کے فٹبال کوچ کو تلاش کر لیا گیا
2 جولائی 2018
11 سے 16 برس کی عمر کے 12 لڑکے اور ان کا فٹبال کوچ ہفتہ 30 جون کو لاپتہ ہو گئے تھے۔ کوچ کی عمر 25 برس ہے۔ لاپتہ ہونے کے بعد سے ان تمام لوگوں سے کوئی رابطہ نہیں ہو رہا تھا۔
ان کی تلاش کے لیے بڑے پیمانے پر کوششیں شروع کی گئیں جبکہ شدید بارشوں اور سیلاب کے سبب امدادی کاموں کی راہ میں رکاوٹیں بھی پیدا ہوئیں۔ تھائی لینڈ کے شمالی حصے میں واقع لوانگ نامی غار کے ان حصوں تک پہنچنے والے راستے بھی بند ہو گئے تھے جن کے بارے میں خیال تھا کہ یہ لاپتہ افراد وہاں موجود ہو سکتے ہیں۔
آج پیر دو جولائی کو دیر گئے صوبہ چیانگ رائے کے گورنر نے میڈیا کو بتایا کہ ان 13 افراد کو تلاش کر لیا گیا ہے۔ نارونگ سک اوسٹاناکورن نے صحافیوں کے بتایا، ’’ہمیں تمام 13 افراد محفوظ مل گئے ہیں۔ ہم اُس وقت تک ان کا خیال رکھیں گے جب تک وہ نکلنے کے قابل نہیں ہو جاتے۔‘‘ صوبائی گورنر نے مزید بتایا، ’’ہم ان تک خوراک پہنچائیں گے اور ایک ڈاکٹر بھی جو غوطہ خور ہو ہو، میں یہ یقین سے نہیں کہہ سکتا کہ وہ کھا پی سکتے ہیں کیونکہ انہوں نے کئی دنوں سے کچھ نہیں کھایا۔‘‘
امدادی ادارے مسلسل اس غار سے پانی باہر پمپ کرنے میں لگے ہوئے تھے۔ غوطہ خور آج پیر کے روز اچھے موسم سے فائدہ اٹھاتے ہوئے غار کے اندر مزید آگے تک پہنچنے میں کامیاب ہوئے۔ انہیں امید تھی کہ وہ ’’وائلڈ بور‘‘ نامی اس ٹیم کو غار کے اندر ایک ابھرے ہوئے مقام پر تلاش کر لیں گے جسے ’’پتایا بیچ‘‘ کے نام سے جانا جاتا ہے۔
اوسٹاکورن کے مطابق یہ لڑکے اس مقام سے مزید 300 سے 400 میٹر آگے چلے گئے تھے کیونکہ مذکورہ حصہ پانی میں ڈوب گیا تھا۔ ابھی تک ان تمام لوگوں کو غار سے باہر نہیں نکالا گیا۔ خیال کیا جا رہا ہے کہ ان کو نکالنے کا آپریشن کافی پیچیدہ ہو سکتا ہے کیونکہ نو دنوں سے مسلسل پھنسے ہونے کے سبب وہ کافی کمزور اور بیمار ہو چکے ہیں۔ جبکہ مذکورہ غار ابھی بھی جزوی طور پر پانی سے بھری ہوئی ہے۔
ا ب ا / ا ا (اے ایف پی، ڈی پی اے)